नेपाली कांग्रेसमा गुट परिवर्तन गर्नेको लर्को,गुट परिवर्तन गर्नेहरुको नामावली सहित

काठमाडौं । जव नेपाली कांग्रेसको महाधिबेशन सुरु हुन्छ तव नेताहरु आफू सुरक्षित हुने ठाउँ खोज्ने गरेका छन् । एउटा महाधिबेशनमा एउटा नेतासँग नजिक रहेका नेताहरु अर्को महाधिबेशनमा अर्के नेताको साहारा लिएको भेटिन्छ । १३ औं महाधिबेशनमा शेरबहादुर देउवा, रामचन्द्र पौडेल र कृष्ण सिटौलासँग प्यानल नै बनाएर चुनाव लडेका नेताहरु १४ औं महाधिबेशनमा गुट परिवर्तन गरेर अर्कै नेतासँग प्यानलमा उमेद्वारी दिदैछन् । कुन कुन नेताहरु छन् त गुट परिवर्तन गर्ने नेताहरु ।
अर्जुननरसिंह केसी
नेता अर्जुननरसिंह केसी पार्टीको १३ औं महाधिवेशनमा शेरबहादुर देउवाको समूहबाट महामन्त्री उमेद्वारीमा पराजित भएका थिए । देउवा सभापतिमा निर्वाचित भए तर केसी महामन्त्री बन्न सकेनन् । अहिले केसी पार्टीभित्र रामचन्द्र पौडेल नेतृत्वको संस्थापन इतर समूहमा पुगेका छन् । अहिले पुरानै गुटमा फर्केका केसी देउवाविरुद्ध संस्थापन इतरका नेतालाई एकजुट बनाउन सक्रिय छन् । केसीले १४औं महाधिवेशनमा पार्टी उपसभापतिमा उम्मेदवारी दिने तयारीमा छन् ।
नारायण खड्का
गुट परिवर्तन गर्ने नेताहरुको लिष्टमा पर्ने अर्का नेता हुन डाक्टर नारायण खड्का । माओवादीविरुद्ध संकटकाल लगाउने कि नलगाउने भन्ने विवादमा कांग्रेस विभाजन हुँदा खड्काले देउवालाई साथ दिएका थिए । २०६४ सालमा पार्टी एकीकरण भयो । त्यसपछि खड्काले बिस्तारै देउवाको साथ छाडे र पुरानो संस्थापनतिर लागेका हुन ।

संस्थापन पक्षतिर आफूलाई प्रतिबद्ध देखाउँदै खड्का सुशील कोइराला नेतृत्वको तत्कालीन सरकारमा सहरी विकास मन्त्री बने । साढे पाँच वर्षअघि भएको पार्टीको १३औं महाधिवेशनमा देउवा इतर समूहबाटै केन्द्रीय सदस्य बनेका थिए उनी । तर १४ औं महाधिवेशनसम्म आइपुग्दा खड्का फेरि देउवाको विश्वासपात्र बनेर परराष्ट्रमन्त्री बनेका छन् ।
चन्द्र भण्डारी
२०७० सालको चुनावमा शुशिल कोइरालाको नजिक भएका नेता चन्द्र भण्डारी कहिले देउवा त कहिले कोइराला गुटमा सामेल भए । सुशीलकै समूहबाट १२औं महाधिवेशनमा केन्द्रीय सदस्य निर्वाचित भण्डारी मन्त्री नपाएपछि उनीविरुद्ध खनिए । अन्तिममा गुट नै परिवर्तन गरेर भण्डारी देउवा समूहमा लागे ।

२०७२ सालमा भएको कांग्रेसको १३औं महाधिवेशनमा देउवा समूहबाट केन्द्रीय सदस्य निर्वाचित भण्डारी २०७४ सालको आमनिर्वाचनअघि देउवा नेतृत्वमा बनेको सरकारमा मन्त्री हुन चाहन्थे । तर, उनी देउवा नेतृत्वको सरकारमा मात्र होइन, कांग्रेसको समर्थनमा गठन भएको माओवादी अध्यक्ष पुष्पकमल दाहाल नेतृत्वको सरकारमा पनि मन्त्री बन्न पाएनन ।
गगनकुमार थापा
पार्टीको तत्कालीन संस्थापन पक्षसँगको निकट सम्बन्ध बनाउँदै राष्ट्रिय राजनीतिमा उदाएका थापा १२ औं महाधिवेशनमा सुशील कोइराला समूहबाटै केन्द्रीय सदस्य निर्वाचित भएका थिए । पार्टीभित्रका अन्य गुटको पनि साथ र समर्थन पाएकै कारण उनले केन्द्रीय सदस्यमा सबैभन्दा बढी मत पाए । सुशीलले १३ औं महाधिवेशनबाट पनि सभापतिमा दोहोरिने बताउँदै आएका थिए । सुशील सभापतिमा दोहोरिन नहुने पक्षमा थापाका साथै नेता नरहरि आचार्यसहित थिए ।

महाधिवेशनको संघारमा सुशीलको निधन हुँदा तत्कालीन संस्थापन पक्षबाट कार्यवाहक सभापतिसमेत रहेका रामचन्द्र पौडेल स्वाभाविक उम्मेदवार जस्ता देखिए । तर, तत्कालीन महामन्त्री कृष्णप्रसाद सिटौला पौडेललाई अस्वीकार गर्दै सभापतिको प्रत्याशी बने । पौडेल समूहबाट कोषाध्यक्षको उम्मेदवार बन्न प्रयासरत थापा अन्तिम समयमा सिटौला समूहबाट महामन्त्रीको उम्मेदवार बने । परिणाम उनको पक्षमा आएन, शशांक कोइराला महामन्त्रीमा निर्वाचित भए । अहिले थापा पौडेल समूहबाट महामन्त्रीको उमेद्वारी घोषणा गरेका छन् ।
विश्वप्रकाश शर्मा
२०५९ सालमा कांग्रेस विभाजन हुँदा नेपाल विद्यार्थी संघको अध्यक्ष थिए नेता विश्वप्रकाश शर्मा । पार्टीका प्रमुख भ्रातृ संगठनका अध्यक्षहरूले देउवा नेतृत्वको पार्टीलाई साथ दिँदा शर्मा गिरिजाप्रसाद कोइराला नेतृत्वको नेपाली कांग्रेसमै बसे । पार्टीको १२औं महाधिवेशनबाट सुशील कोइरालालाई सभापति बनाउनसमेत भूमिका खेलेका शर्मा १३औं महाधिवेशनमा भने देउवातिर खुले ।

कोइराला नेतृत्वको कांग्रेस केन्द्रीय समितिमा नेवि संघका पूर्वअध्यक्षहरू केन्द्रीय सदस्य र आमन्त्रित केन्द्रीय सदस्य मनोनीत भए । त्यसपछि देउवासँग नजिकिएका शर्मा अहिले पार्टीको प्रवक्ता छन । १४औं महाधिवेशनमा महामन्त्रीको उम्मेदवारी घोषणा गरेका शर्मा देउवासँग रहेका छन् ।
कुलबहादुर गुरुङ
१३ औं महाधिवेशनमा देउवाको पक्षमा खुलेका थिए । आमनिर्वाचनपछि गुरुङ उनको विपक्षमा देखिए । उमेरले पनि पाका नेता गुरुङको १४औं महाधिवेशनमा कस्तो भूमिका हुन्छ खुलेका छैनन् ।

केन्द्रीय सदस्य चिनकाजी श्रेष्ठ, आनन्द ढुंगाना, गोविन्द भट्टराईसहितका नेता १३ औं महाधिवेशनपछि गुट फेरेर देउवा समूहमा लागेका हुन् । कांग्रेसको इतिहास जति लामो छ, त्यसभित्र गुटगत राजनीति पनि उति नै लामो छ । अहिले नेताहरु धमाधम उमेद्वारी घोषणा गरिरहेका छन् । देउवा र पौडेल समूहसँग नजिक भएर उमेद्वारी घोषणा गरिरहेका नेताहरु अन्तिम समयसम्म फेरि गुट परिवर्तन नगर्लान भन्न सकिन्न ।

थप समाचार

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप

कार्यवाहक प्रधानमन्त्री सिंहले भेटे राष्ट्रपति पौडेल

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…