मोदीसँगको भेटवार्ता उपलब्धिमूलक हुने प्रधानमन्त्री देउवाको विश्वास

खोज पत्रिका शनिबार, २०७८ चैत्र १९, ०२ :५९ बजे

काठमाडौं । प्रधानमन्त्री शेरबहादुर देउवाले भारतीय प्रधानमन्त्री नरेन्द्र मोदीसँगको भेटवार्ता उपलब्धिमूलक हुने दाबी गरेका छन् । भारत भ्रमणमा रहेका देउवाले भारतमा रहेको नेपाली दूतावासले आयोजना गरेको स्वागत कार्यक्रममा यस्तो बताएका हुन् । प्रधानमन्त्री देउवाले स्वास्थ्य, ऊर्जा र पर्यटन लगायतका क्षेत्रमा दुई पक्षीय हित प्रवर्द्धन गर्न भ्रमणले सहयोग पुग्ने बताए ।

नेपाल र भारतबीच प्राचीन कालबाट रही आएको सम्बन्धलाई नयाँ उचाइमा पुर्‍याउन जरुरी रहेको देउवाको भनाई छ । प्रधानमन्त्री देउवाले भोली भारतीय प्रधानमन्त्रीको कार्यालय हैदरावाद हाउसमा समकक्षी नरेन्द्र मोदीसँग प्रतिनिधिमण्डल स्तरीय वार्ता गर्ने कार्यक्रम छ । प्रधानमन्त्री मोदीले आफ्ना नेपाली समकक्षीको सम्मानमा दिवा भोजको आयोजना गर्नेछन् ।

वार्तापछि ३५ किलोमिटर लामो जयनगर–कुर्था रेल सेवा तथा भारत सरकारको सहयोगमा निर्मित सोलु कोरिडोर प्रसारण लाइनको शुभारम्भ, नेपालमा निर्माणाधीन १३२ वटा स्वास्थ्य सेवा केन्द्रको प्रगतिबारे दुवै प्रधानमन्त्रीले श्रव्य दृश्यका माध्यमबाट जानकारी लिने कार्यक्रम पनि तय भएको छ ।