चुनावबाट उदायका बालेन र हर्क,जसले जित्दैछन् जनताको मन, कस्ता–कस्ता स्वतन्त्र आए नेतृत्वमा

काठमाडौं । लामो राजनीतिक पृष्ठभूमि र विरासत बोकेका पार्टीहरूका लागि अब स्वतन्त्र उम्मेदवारहरु नै चुनौँती बन्न थालेका छन् । कुनै एरिया विशेषलाई आफ्नो पकेट क्षेत्र दाबी गर्ने दल र उम्मेदवारहरुलाई यो स्थानीय तह निर्वाचनमार्फत मतदाताहरुले गतिलो जवाफ दिएका छन् । दलीय उम्मेदवारमाथी सबैभन्दा ठूलो झड्का लागेको छ, देशकै पुरानो काठमाडौं महानगरपलिकामा ।

यहाँ लामो राजनीतिक पृष्ठभूमि र विरासत बोकेका पार्टीहरूलाई पराजित गर्दै ¥यापर समेत रहेका स्ट्रकचरल इन्जिनियर बालेन्द्र साहले बाजी मारेका छन् । स्वतन्त्र उम्मेदवार साहले ६१ हजार ७६७ मत ल्याउँदा नेपाली कांग्रेसकी उम्मेदवार सिर्जना सिंहले ३८ हजार ३४१ र एमालेका उम्मेदवार केशव स्थापितले ३८ हजार ११७ मत ल्याएका छन् ।

पाँच वर्षका लागि काठमाडौं महानगरको व्यवस्थापकिय जिम्मेबारीमा पुगेका बालेन्द्र साह (बालेन) आखिर को हुन छ ?
पुख्र्यौली घर महोत्तरीको एकडारा गाउँपालिकाका– २ मा रहेपनि बालेन आफू भने काठमाडौंको नरदेवीमा जन्मिएका थिए । आयुर्वेदिक चिकित्सक डा. रामनारायण शाह र ध्रुवदेवी शाहका कान्छा छोराका रुपमा २०४७ बैशाख १४ गते जन्मिएका साहको परिवार अहिले तीनकुनेको गैरीगाउँमा बस्दैआएको छ । नरदेवीको जलजला माध्यामिक विद्यालयबाट प्रारम्भिक शिक्षा सुरु गरेका बालेनले ह्वाइट हाउस इन्स्टिच्युट अफ टेक्नोलोजीबाट सिभिल इन्जिनियरिङमा स्नातक र भारतको कर्नाटक विश्वेश्वरैया राष्ट्रिय प्रौद्योगिक संस्थानबाट स्ट्रक्चरल इन्जिनियरिङमा स्नातकोत्तरसम्मको शिक्षा हासिल गरेका छन् ।

२०७२ सालको महाभूकम्पपछि उद्धार र राहतसँगै पुनर्निमाणको कामका सिलसिलामा बालेन देशका ६५ जिल्ला पुगेका छन् । जनस्वास्थ्यकर्मी सबिना काफ्लेसँगको विवाह बन्धनमा बाधिएका साह ¥याप र इञ्जिनियरिङसँगै नेपालको राजनीतिमा रुचि राख्ने युवाका रुपमा दरिएका छन् । विवेकशील र साझा पार्टी फुट्दैगर्दा विवेकशीलपार्टीको सम्पर्कमा पुगेर काठमाडौँको नगरप्रमुखमा उठ्न चाहेका उनी सदस्यतापछि बिचार गर्ने जवाफपछि स्वतन्त्र उम्मेदवारको रूपमा चुनावी मौदानमा होमिएका थिए ।

२०७४ को स्थानीय तह निर्वाचनपछि बालेनले फेशबुकमा लेखेका थिए– “मैले आज भोट गरिनँ । म उम्मेदवार थिइनँ । मैले सिभिल इन्जिनियरिङमा स्नातक गरेँ, म स्ट्रक्चरल इन्जिनियरिङको मास्टर्सको आधा बाटोमा छु । मलाई देश बनाउन आउँछ । म अर्को पटक भोट गर्छु, र आफैँलाई भोट दिन्छु । म मेरो देशको विकास गर्छु । मलाई अरू कसैको भर लाग्दैन“। हो आज उनको पाँच वर्षअघि देखेको यो महानगरको नृत्व गरेर क्षमता प्रदर्शन गर्ने हुटहुटी आज पुरा भएको छ । चुनावका वेला प्रतिवद्धता र बाचाहरुको चाङ लगाउने र निर्वाचित भइसकेपछि चटक्कै भुल्ने दलहरुका प्रवृत्ति र विकास प्रणालीमा रहेको झमेला लगायतबाट बाक्क भएका बालेनलाई आज उसैगरि वाक्कदिक्क भएका मतदाताले अवशर दिएका छन् ।

मेयरमा विजयभएसँगै बालेनले काठमाडौं महानगरलाई विश्वकै उत्कृष्ठ शहर बनाउने प्रतिबद्धता गरेका छन् । ‘जताजातै फोहोर आफैंले देखेको छु, दुर्गन्धका कारण खुला रुपमा हिँड्न सकिन्न, त्यसैले बस्न लायक सहर आफैंले बनाउनुपर्छ भन्ने बालेनको मुख्य चुनौती नै यही छ । अहिलेसम्म बालेन स्वयम् कस्ता व्यक्ति हुन् भन्ने स्पष्ट भइसकेको छैन । कर्मचारी प्रशासन चलाउनेदेखि लिएर विभिन्न राजनीतिकसँग समन्वय गर्नेसम्मका विषयले बालेनको भविष्य निर्धारण गर्ने आँकलन गर्न थालिएको छ । बालेन मात्रै होइन यो स्थानीय तह निर्वाचनमा अन्य १२ वटा पालिकाको नेतृत्व स्वतन्त्र व्यक्तिको हातमा पुगेको छ । काठमाडौं महानगरसँगै मतदाताले तीन वटा उपमहानगर धरान, जनकपुरधाम र धनगढीमा स्वतन्त्र उम्मेदवारलाई विजयको माला लगाइदिएका छन् ।
धरानको मेयरमा एक्लो अभियन्ता हर्क साङपाङको उदय
एक्लो अभियन्ताका रुपमा रहेका हर्क साङपाङ राईलाई धरान उपमहानगरको नेतृत्वमा पुर्याएर मतदाताहरुले राजनीतिक दलहरुले आफ्नो ‘गढ’ र बलियो क्षेत्र भन्दै गर्नेगरेको दाबीलाई जवाफ दिएका छन् । २०३९ सालमा खोटाङको खार्तम्छामा जन्मिएका साङपाङ शुक्रबारे माविबाट एसएलसी दिएपछि २०५५ सालतिर उच्च शिक्षाका लागि धरान झरेका थिए । महेन्द्र बहुमुखी क्याम्पसबाट राजनीति र समाजशास्त्रमा स्नातक गरेका पूर्व ब्रिटिस लाहुरेका छोरा हर्कले केही समय धरानमा ट्युसन सेन्टरमा अंग्रेजी र कम्प्युटर शिक्षा पढाए ।

रोजगारीका क्रममा ६ वर्षसम्म इराक र अफगानिस्तानमा बसेका राई गीत लेखन र गायनमा समेत दख्खल राख्छन् । जिद्दी र विद्रोही स्वभावका राई २०७२ सालतिर धनकुटे रोड विस्तारविरुद्धको संघर्षसहितको आन्दोलनको सहसंयोजक बनेपछि चर्चामा आएका थिए । यसपछि उनले भ्रष्टचार र बेथितिविरुद्ध निरन्तर बोल्न थाले । खानेपानीको विषय, नगरपालिका र विपी प्रतिष्ठानको भ्रष्टचार, सुकुम्बासी संरक्षण र व्यवस्थान, सडकको खाल्डाखुल्डी र महँगी नियन्त्रणबारे आवाज उठाउँने उनै राई अहिले उपमहानगरको मेयरमा जनमतबाट अनुमोदन भएका छन् । मेयर बनेपछि पनि उनी जनताका ससामान्य समस्या समाधानमा आफै अग्रसर देखिन थालेका छन् ।

मधेश प्रदेशको राजधानी समेत रहेको जनकपु्रधाम उपमहानगरपालिकाको प्रमुखमा कांग्रेसबाट असन्तुष्ट बन्दै स्वतन्त्र उम्मेदवार बनेका मनोजकुमार साह विजयी भएका छन् । उनले नेकपा एमालेका शिवशंकर साहलाई भारती मतले पराजित गरे । यो समेत राजनीतिकर्मीको झुटको खेती विरुद्धको झापड भएको आँकलन गर्न थालिएको छ । सुदूरपश्चिम प्रदेशको राजधानी समेत रहेको धनगढी उपमहानगरपालिकाको प्रमुखमा स्वतन्त्र उम्मेदवारी दिएका गोपाल हमाल विजयी भएका छन् ।

नेपाली कांग्रेसका उम्मेदवार रहेका निवर्तमान उपमहानगर प्रमुख नृप बहादुर वडलाई १२ हजार ४८ बढी मतान्तरले पराजित गरेका हमाल भने अन्य उम्मेदवार भन्दा फरक पात्र हुन । धनगढीको व्यापारिक क्षेत्रमा प्रतिष्ठा कमाएका हमाल कैलाली उद्योग वाणिज्य संघको अध्यक्ष भएका बेलादेखि नै चर्चा थिए । हमाल व्यवसायी मात्रै नभएर समाजसेवीका रुपमा समेत दरियका छन् । धनगढीमा कपडा बैंक र शववाहन सञ्चालन गर्दैआएका हमालले ‘सुन्दर सुदूरपश्चिम’ अभियान अन्तर्गत गरेका केही काम कामबाट प्रशंशा बटुल्दैआएका छन् ।

मधेश प्रदेशको बर्दिवास नगरपालिकामा स्वतन्त्र उम्मेदवार प्रल्हाद कुमार क्षेत्रीले पाँच वर्षे कार्यकालका लागि मेयर बन्ने मौका पाए । क्षेत्रीले त आफूसहित उपप्रमुखमा तारादेवी महतो र नगरका १४ वडामध्ये ४ वटामा आफू निकटका स्वतन्त्र वडाध्यक्षका उम्मेदवारलाई समेत विजयी गराएका छन । आश्वासनको खेती गरेर काम नगर्ने दलीय प्रबृत्तिको बदलामा मतदाताले स्वतन्त्रलाई रोजेको चर्चा चलिरहेको छ ।

कर्णाली प्रदेशको जुम्ला सदरमुकामा चन्दननाथ नगरपालिकाको प्रमुखमा स्वतन्त्रबाट उम्मेदवार बनेका राजुसिंह कठायतले कांग्रेसका उम्मेदवार पदमबहादुर शाहीलाई पराजित गरे । कर्णाली प्रदेशकै कालिकोट जिल्लाको खाँडाचक्र नगरपालिका प्रमुखमा स्वतन्त्र उम्मेदवार कमलबहादुर शाहीले एमालेका उम्मेदवारलाई पराजित गर्दै वाजी मारे । प्रदेश नम्वर १को ओखलढुंगा जिल्लाको मानेभञ्ज्याङ गाउँपालिकाको अध्यक्षमा ज्ञानेन्द्र रुम्दाली स्वतन्त्रबाट विजयी भए । प्रदेश नम्वर १ कै भोजपुर जिल्लास्थित साल्पासिलिछो गाउँपालिकाको प्रमुखमा स्वतन्त्र उम्मेदवार दौलथ कुलुङ विजयी भएका छन् ।

सुदूरपश्चिमको बैतडी जिल्लास्थित डिलासैन गाउँपालिकाको अध्यक्षमा पनि स्वतन्त्र उम्मेदवरा सन्तोषप्रकाश जोशी विजयी बनेका छन् । कर्णाली प्रदेशको कालिकोटस्थित सान्नी त्रिवेणी गाउँपालिकामा समेत स्वतन्त्र उम्मेदवार मोहनबहादुर केसीले बाजी मारे । हुम्लाको चंखेली गाउँपालिकाको अध्यक्षमा प्यारीलाल शाही, डोल्पाको डोल्पोबुद्ध गाउँपालिकाका स्वतन्त्र उम्मेदवार कार्मा छोईबेल गुरुङ मतदाताबाट पाँच बर्षका लागि अनुमोदन भएका छन् । डोल्पाकै शेफोक्सुण्डो गाउँपालिकाको उपाध्यक्षमा स्वतन्त्र उम्मेदवार पेम्मा वाङ्छेन गुरुङ, गण्डकी प्रदेशकै मनाङको मनाङ ङिस्याङ गाउँपालिकाको उपाध्यक्षमा स्वतन्त्रबाट उम्मेदवारी दिएकी छिरिङ गुरुङ विजयी बनेका छन् ।

देशभर तीन सय बढी स्वतन्त्र उम्मेदवारहरु गाउँ तथा नगर सदस्य र करिब ५० जना स्वतन्त्र उम्मेदवार वडाध्यक्षमा निर्वाचित भएका छन् । कतिपय दलीय राजनीतिमै नलागेका समाजसेवी भएपनि कतिपय उम्मेदवारहरु दलबाट निकट नपाएर स्वतन्त्र बनेकाहरु छन् । बालेन्द्र शाह र हर्क साङपाङको उदयलाई भने फोहोरी राजनीतिमाथीको झापडका रुपमा हेरिएको छ ।

थप समाचार

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप

कार्यवाहक प्रधानमन्त्री सिंहले भेटे राष्ट्रपति पौडेल

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…