मतदाता फकाउने उम्मेद्वारहरुको नयाँ शैली,फेसबुकबाट लाखौंको बुस्ट मार्फत प्रचार–प्रसार

खोज पत्रिका आइतवार, २०७९ कार्तिक १३, ०१ :५४ बजे

काठमाडौं । पछिल्लो समय कुनै फिल्मको प्रोमो, गीत संगीत, कुनै प्रतियोगिता लगायतलाई प्रोमोशन गर्नको लागि सामाजिक सन्जालमा खर्च गरेर भएपनी बुस्ट् गर्ने चलन जस्तै बनेको छ । गएको स्थानीय तहको निर्वाचनमा यसको ब्यापक प्रयोग गरियो । अहिले फेरी मंसिर ४ गतेको चुनावको लागि अधिकांश उम्मेद्वारले सामाजिक सन्जालमा पैसा खर्च गर्न थालेका छन । जसलाई निर्वाचन आयोगले नियमन गरिरहेको जनाएको छ ।

चुनावको बेला उम्मेद्वारहरुले सामाजिक सञ्जालको प्रयोग गर्ने, पैसा खर्च गरेर भएपनि आफ्नो राम्रो राम्रो कुरा मात्र पोस्ट गरेर धेरै प्रयोगकर्ता समक्ष पुर्याउने फेसन चलेको छ । प्रविधिको प्रयोग गर्दै आफ्न एजेण्डा उम्मेद्वारले मतदाता समक्ष पुरयाईरहेका छन । जसमा नेपाल समाजवादी पार्टीको तर्फबाट काठमाण्डौ क्षेत्र नम्बर ७ कि उम्मेद्वार मानुशी यमी भट्टराई अगाडि देखिएकी छिन् । उनले आफ्नो फेसबुक पेजबाट आफ्नो निर्वाचन सामाग्रीलाई धेरै मतदाताको फेसबुकसम्म पुर्याउन पैसा तिरेर बुस्ट गरेकी छिन् ।

जसबापत उनले अहिलेसम्म ९ सय डलर अर्थात झन्डै १ लाख २० हजार खर्च गरिसकेकी छिन् । यद्यपी उनको पैसा भने उज्ज्वल श्रेष्ठ नामको ब्यक्तिमार्फत तिरिएको छ । त्यस्तै काठमाडौ क्षेत्र नम्बर एक का राप्रप्राको तर्फबाट उम्मेद्वार बनेका रबिन्द्र मिश्रले पनि फेसबुक पेजमार्फत प्रचार गर्न थालेका छन । उनले अहिलेसम्म आफ्न ७ वटा पोस्टको लागि ७०० डलर अर्थात ९२ हजार रकम तिरिसकेका छन ।

त्यस्तै काठमाडौ ७ बाट जसपाको तर्फबाट उम्मेद्वार बनेका राजेन्द्रप्रसाद श्रेष्ठले पनि सामाजिक सञ्जाल फेसबुकमा पैसा बुझाईरहेका छन । उनले हालसम्म ४५ वटा पोस्ट मार्फत ५८० डलर अर्थात ७७ हजार तिरिसकेका छन । यो बाहेक सयौ उम्मेद्वारले प्रचारको प्रभावकारी माध्यम फेसबुकलाई बनएका छन । यो बिषयमा निर्वाचन आयोगले कुनै कडाइ नगरे पनि नियमन र अनुगमन गरिरहेको जनाएको छ ।

अहिलेसम्म तथ्यांकलाई हेर्दा २ हजार ३ सय २४ चुनाव लक्षित पोस्टलाई पैसा तिरेर धेरै प्रयोगकर्ता माझ पुर्याउने काम भएको छ । जसबापत उम्मेद्वारले २० हजार ७ सय ३१ डलर अर्थात २७ लाख ५७ हजार रुपैया फेसबुकलाई बुझाएका छन । अहिले सामाजिक सञ्जालमा खर्च गर्ने कुनै सिमा नतोकिए पनि पछी खर्च विवरणमा त्यही सिमाभित्र नै यो रकम पनि जोडिने आयोगले जनाएको छ ।