खाद्य व्यवस्था तथा ब्यापार कम्पनीमा किचलो, जुनियरलाई विभागिय नेतृत्व दिएको आरोप(बिज्ञप्तीसहित)

खोज पत्रिका बिहिबार, २०८१ बैशाख १३, १५ :१५ बजे

काठमाडौं । खाद्य व्यवस्था तथा ब्यापार कम्पनी लिमिटेडमा विभागिय नेतृत्वको बिषयलाई लिएर असन्तुष्टि देखिएको छ । बैशाख ५ गतेदेखि रिक्त रहेको प्रमुख कार्यकारी अधिकृतको काम गर्न डिल्लीराज लम्साललाई निमित्त कार्यकारी अधिकृतको जिम्मेवारी सञ्चालक समितिले दिएको थियो ।

लम्साल निमित्तको कार्यभार सम्हालेपछि उनले आफू निकट जुनियर कर्मचारी घनश्याम अर्याललाई मानव संशाधन विभागको विभागिय प्रवन्धकको जिम्मेवारी दिएको भन्दै कर्मचारीहरुले बिरोध जनाएका छन् ।

खाद्य व्यवस्था तथा ब्यापार कम्पनी लिमिटेड कर्मचारी युनियनद्धारा जारी बिज्ञप्तीमा निमित्त प्रमुख कार्यकारी अधिकृतद्धारा कम्पनीमा रहेको विद्यमान अभ्यास र पद्धतिलाई लत्याएर सिनियर कर्मचारीहरु हुँदा हुँदै सो कुरालाई वेवास्ता गर्दै जुनियर कर्मचारीलाई मानव संशाधन विभागको विभागिय प्रवन्धकको जिम्मेवारी तोकिएको उल्लेख छ ।

अध्यक्ष देवेन्द्र राईद्धारा जारी बिज्ञप्तीमा जिम्मेवारी तोकिएका प्रवन्धकमाथि सर्बोच्च अदालतमा मुद्धा समेत चलिरहेको र हालसम्म फैसला पनि नभएको विवादित ब्यक्तिलाई जिम्मेवारी दिइनुले न्याय संगत, युक्ति संगत र पारदर्शीपूर्ण र तटस्थ तरिकाले भूमिका निर्वाह गर्न नसक्ने भनिएको छ ।

युनियनले तत्काल निर्णय सच्याउन समेत निमित्त कार्यकारी अधिकृत डिल्लीराज लम्साललाई आग्रह गरेको छ । बैशाख ५ गते सरकारले खाद्य व्यवस्था तथा व्यापार कम्पनीमा प्रमुख कार्यकारी अधिकृत माग गरेको छ। उद्योग, वाणिज्य तथा आपूर्ति मन्त्रालयले सूचना जारी गर्दै सीईओ माग गरेको हो ।

सूचना अनुसार आवेदन दिन चाहने योग्य व्यक्तिले २१ दिनभित्र आवेदन दिन सक्ने भनिएको छ । नियुक्तीको प्रक्रिया अघि बढेकै बेला लम्सालले जिम्मेवारी दिएको भन्दै असन्तुष्टि बढेको हो ।