१५ हजार ४३८ जनाको पीसीआर परिक्षण गर्दा ३ हजार १६७ जनामा कोरोना पुष्टि

खोज पत्रिका आइतवार, २०७७ कार्तिक २, ०१ :०० बजे

काठमाडौं । पछिल्लो २४ घण्टामा देशभर ३ हजार १६७ जनामा कोरोनाभाइरस संक्रमण पुष्टि भएको छ । शनिबारको नियमित प्रेस ब्रिफिंगमा स्वास्थ्य मन्त्रालयका प्रवक्ता डाक्टर जागेश्वर गौतमले संक्रमित थपिएको जानकारी दिएका हुन् । यससँगै कुल संक्रमितको संख्या १ लाख २९ हजार ३०४ पुगेको छ । पछिल्लो २४ घण्टामा १५ हजार ४ सय ३८ जनाको पीसीआर भएको छ भने हालसम्म पीसीआर परीक्षण हुनेको कुल संख्या १२ लाख ६९ हजार ६ सय ५ पुगेको छ ।

यसैगरी शनिबार १२ जनाको मृत्यु भएसँगै कोरोनाबाट मृत्यु हुनेको कुल संख्या ७ सय २७ पुगेको छ । नयाँ संक्रमितमध्ये १ हजार ७ सय ४६ जना काठमाडौं उपत्यकाका छन् । काठमाडौंका १ हजार ४ सय ५१ जना, ललितपुरका १ सय ५२ र भक्तपुरका १ सय ४३ जनामा कोरोना पुष्टि भएको हो ।

पछिल्लो २४ घण्टामा देशका विभिन्न अस्पतालबाट १ हजार ८ सय जना डिस्चार्ज भएसँगै ८९ हजार ८ सय ४० जनाले कोरोना जितेका छन् । देशभर अहिले ३८ हजार ७३७ संक्रिय संक्रमित रहेका छन् । सक्रिय संक्रमित मध्ये १३ हजार २ सय ९९ जनाको देशका विभिन्न अस्पतालमा र बाँकी २५ हजार ४ सय ३८ जनाको होम आइसोलेसनमा रहेका छन् । आईसीयूमा २ सय ९० जना र भेन्टिलेटरमा ६६ जना संक्रमितहरु उपचाररत छन् ।

क्याटेगोरी : देश/दुनियाँ, ब्रेकिंग न्युज, शिक्षा स्वास्थ्य
ट्याग : #कोरोनाभाइरस संक्रमण