बाह्र वर्षमा दर्जन बढी जिपलाईन सञ्चालनमा,बढ्दैछ लगानीकर्ताको किन धेरै आकर्षण ?

काठमाडौं । नेपालमा छोटो समयमै सबैभन्दा आकर्षक साहसिक पर्यटकीय गन्तब्यका रुपमा जिपलाइनले आफ्नो पहिचान बनाउन सफल भएका छन् । सबैभन्दा रोमाञ्चक अनुभूति दिने गरी पोखरामा पहिलो पटक सराङकोट डाँडाबाट जिपलाइन शुरु भएको र त्यसयता देशभर जिपलाइनको संख्या झण्डै एक दर्जन पुगेका छन् ।

अधिकांश सञ्चालनमा आइसकेका छन् भने केही सञ्चालनको क्रममा रहेको पाइएको छ । जिपलाइनमा व्यवसायी र साहसिक आन्तरिक पर्यटकको सबैभन्दा बढी आकर्षण कोरोना महामारीकै बीचमा समेत देखिने गरेको छ । जिपलाइन सञ्चालन गरिरहेका कम्पनीहरुले विभिन्न प्याकेजमा पर्यटक आकर्षित गर्दा आम्दानी पनि राम्रै गरिरहेका छन् ।
यी हुन नेपालमा सञ्चालित जिपलाइनहरु
हाइड्राउण्ड एडभेन्चरः सराङकोट (कास्की)
कास्कीको सराङकोट डाँडा ९१५५० मिटरबाट हेम्जामा झर्ने यो जिपलाइन सन् २०१० मा शुरु भएको हो । यो नेपालकै पहिलो जिपलाइन मानिन्छ । हाइग्राउण्ड एडभेन्चर जिपलाइन अमेरिकी ब्राण्ड जीपफ्लायरको फ्रेन्चाइज भएका कारण समेत यसमा सोही कम्पनीको मापदण्डसँग मेल खाने गरी प्रविधि जडान गरिएको छ ।
धुलिखेल जिपलाइनः धुलिखेल (काभ्रे)
काठमाडौं नजिक खुलेको दोस्रो जिपलाइन धुलिखेल जिपलाइन हो । तीन वर्ष अगाडि सञ्चालनमा आएको यो जिपलाइनले खासगरी काठमाडौं उपत्यकाका युवापुस्तालाई आकर्षित गरिरहेको छ । यसको लम्बाई ११ सय मिटर छ । माओवादी केन्द्रका अध्यक्ष प्रचण्डले जिपलाइन गरेपछि यसको चर्चा चुलिएको छ।
गढी जिपलाइनः मकवानपुर
कोरोना भाइरसको महामारी शुरु भइसकेको तर नेपालमा लकडाउन हुनु भन्दा ठ्याक्कै अगाडि सञ्चालनमा आएको थियो गढी जिपलाइन । मकवानपुर जिल्लाको गढीगाउँपालिका–२, ताप्लाखर्चमा ११ सय मिटर लामो जिपलाइन सञ्चालनमा छ । हेटौडाबाट १८ किलोमिटर लामो यो जिपलाइनको साथमा अन्य पर्यटकीय गन्तब्यहरु पनि छन् ।
देवीस्थान जिपलाइनः भेडेटार (धरान)
भेडेटारबाट शुरु भएको जिपलाइनको ल्याण्डिङ भने देवीस्थानमा हुने गरी बनाइएको छ । यसको दुरी ६ सय ५० मिटर लामो छ । ३ करोड रुपैयाँ लगानी रहेको यो जिपलाइनमा ४५ सेकेन्डमा दुरी पार हुन्छ । नेपालको पूर्वी भेगमा खुलेको पहिलो जिपलाइन पनि हो ।
हार्नेस जिपलाइनः पर्वत (कुष्मा)
पछिल्लो समय साहसिक पर्यटकका लागि आकर्षणको केन्द्र बनेको पर्वतको बन्जीजम्प पनि एउटा आकर्षक गन्तब्य हो । यो जिपलाइन गत आइतबारबाट मात्रै शुरु भएको हो । १४८० मिटर लामो यो जिपलाइन कालिगण्डकी नदीको किनारस्थित एडभेन्चर रिर्सोटमा ल्याण्ड हुने गरी बनेको छ ।
रिभर फन बिच रिर्सोटः त्रिशुली
१२ वर्षदेखि त्रिशुली नदी किनारमा सञ्चालनमा रहेको रिभर फन बिच रिर्सोटले हालै जिपलाइनको परीक्षण सम्पन्न गरेको छ । यो जिपलाइन छिट्टै व्यवसायिक सञ्चालनमा ल्याउने तयारी छ । यहाँ साढे ५ सय मिटरको जिपलाइन निर्माण गरिएको पाइएको छ ।

पृथ्वी राजमार्गको चुमखोलादेखि गोरखाको बुट्टारस्थित रिर्सोटसम्म विस्तार गरिएको जिपलाइनको अधिकांश उडान नदीमाथि हुने छ । १८ मिटर अग्लो पाँचतले टावर निर्माण गरि त्यसको चौथो तलाबाट जिपलाइन गर्न सकिने बताइएको छ ।
त्रिशुली रिभर साइट रिर्सोटः त्रिशुली
त्रिशुली नदी किनारमा खुलेका रिर्सोटमध्ये साहसिक गतिविधिका लागि लगानी गरेको अर्को रिर्सोट हो त्रिशुली रिभर साइट रिर्सोट । यहाँ २ सय मिटर लामो जिपलाइन सञ्चालनमा छ । यो रिर्सोटले आफ्नो प्याकेजमा जिपलाइन समेत राखेर पर्यटक लोभ्याउने गरेको छ ।
योयो जिपलाइनः ह्याम्पेडाँडा (भक्तपुर)
भक्तपुरको सुर्यविनायक नगरपालिका ७ स्थित पर्यटकीय स्थल घ्याम्पेडाँडामा योयो जिपलाइन सञ्चालनमा आएको छ । १२ सय मिटर लामो जिपलाइनको यात्रा गर्न पिकनिक स्पटका रुपमा चर्चित यस भेगमा हरेक दिन जसो पालो कुरेरै आन्तरिक पर्यटकहरुले मजा लिने गरेका छन् । काठमाडौंको दृष्यावलोकनसहित यो जिपलाइनको मज्जा लिनेहरुको भीडभाड बढ्दो छ ।
चन्द्रागिरि जिपलाइनः
चन्द्रागिरि– प्रारम्भमा १ सय मिटर लामो जिपलाइन चलाएको चन्द्रागिरि हिल्स प्रालिले अहिले यहाँ २ सय मिटर लामो अर्को जिपलाइन सञ्चालनमा ल्याएको छ । चन्द्रागिरिको भ्रमणमा जाने आन्तरिक तथा बाह्य पर्यटकले यसको मज्जा लिने गरेका छन् । केही समय अगाडि बाबा रामदेवले यहाँ पुगेर जिपलाइनको मज्जा लिएका थिए ।
दरवार एडभेन्चर जिपलाइनः नुवाकोट
नुवाकोट दरवारबाट ५ मिनेटको दूरीमै अवस्थित दरबार एडभेन्चर जिपलाइन ऐतिहासिक नुवाकाटे दरबार भ्रमणमा जानेहरुका लागि आकर्षण बनेको छ । १३ सय मिटर लामो यो जिपलाइन समेत कोरोना महामारीकै बीचमा सञ्चालनमा आएर राम्रो आम्दानी गरिरहेको छ ।
भक्तपुरको नगरकोटमा समेत जिपलाइन बनेको छ ।

धादिङको सातघुम्तीस्थित ट्राइम्स रिर्सोट (वाइरोड) मा, कास्कीको सराङकोटमा निर्माण सम्पन्न भई सञ्चालनको तयारीमा रहेको केवलकार परिसर भित्र समेत १ सय मिटर लामो जिपलाइन बन्दैछ । यता, बुटवलको लक्ष्मी आदर्श सामुदायिक वन उपभोक्ता समितिले जिपलाइन सञ्चालनमा ल्याएपनि सञ्चालनमा आउन बाँबी छ । यसबाहेक सौराहा, विसंखुनारायण, साँगासहितका क्षेत्रमा समेत जिपलाइन जडान भएर सञ्चालनको पर्खाइमा छन् ।

जिपलाइन चढेको लम्बाइ हेरेर १ हजारदेखि ५ हजार रुपैयाँसम्म शुल्क लिने गरिएको छ । रिर्सोटहरुले प्याकेजमै जिपलाइनको मूल्य राखेर दोहोरो आम्दानी गरिरहेका छन् । जिपलाइन क्षेत्रमा देखिएको आन्तरिक एवंम बाह्य पर्यटकहरुको आकर्षणले कोरोनाका कारण सुस्ताएको पर्यटन उद्योगमा केही आशा भर्न थालेको छ ।

थप समाचार

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप

कार्यवाहक प्रधानमन्त्री सिंहले भेटे राष्ट्रपति पौडेल

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…