Techie IT
  • ७ वैशाख २०८२, आईतबार
KhojPatrika

सत्तारुढ दलमा दरार,एमसीसी पारित गर्न खोजे गठबन्धन टुट्ने माओवादी र समाजवादीको चेतावनी


काठमाडौं । अमेरिकी अनुदान सम्झौता एमसीसी संसदबाट अनुमोदन गर्ने विषयबारे सत्ता गठबन्धनभित्र तीब्र मतभेद देखिएको छ । प्रधानमन्त्री शेरबहादुर देउवाले एमसिसि पारित गर्न असहयोग गरे गठबन्धन टुट्नसक्ने चेतावनी दिएको खबर सार्वजानिक भएको छ । उता माओबादी केन्द्र र एकीकृत समाजबादीका नेताहरुले समेत जवरजस्ती एमसिसि पारित गर्न खोजे गठबन्धन तोड्ने चेतावनी दिइरहेका छन् । अहिले एमसीसीकै कारण सत्ता गठबन्धनमा भाँडभैलो मचिने संकेत देखिएको छ ।

तत्कालीन केपी ओली सरकारलाई विस्थापन गर्दै संसद पुनस्र्थापनाका लागि एकठाउँमा उभिएका गठबन्धनमा रहेका दलहरु पछिल्लो समय राष्ट्रिय तथा अन्तर्राष्ट्रिय विषयहरुमा फरक कित्तामा उभिएका छन् । एमसीसी सम्झौता संसदबाट पारित गराउने वा नगराउने भन्ने विषयमा पाँच् दलीय गठबन्धनमा साझा धारणा बन्न नसक्दा खटपट समेत सुरु भएको छ । सत्ता गठबन्धनको नेतृत्व गरिरहेको दल नेपाली कांग्रेसले एमसीसी यथाशीघ्र अनुमोदन गर्न घच्घच्याइरहेको छ ।

नेकपा माओवादी केन्द्र र नेकपा एकीकृत समाजवादी यथास्थितिमा एमसीसी पास गर्न नसकिने अडानमा छन् । जनमोर्चाले त यसअघि नै एमसीसीमा आफ्नो सहमति नरहने स्पष्ट पारिसकेको छ । सत्ताघटक जसपाका संघिय परिषद अध्यक्ष बाबुराम भट्टराईले पनि बेला बेलामा संसदबाट तत्काल एमसीसी पारित गर्नुपर्ने अभिव्यक्ति दिइरहेका छन् । उता अध्यक्ष उपेन्द्र यादव भने राष्ट्र«हितमा हुनेगरी राष्ट्रि«य सहमतिका आधारमा मात्रै पारित गर्नुपर्ने बताइरहेका छन् । पछिल्लो समय एमसीसीकै मुद्दाले गठबन्धनभित्र टकराव बढ्दै गएको छ । उता नेकपा एमाले भने गठबन्धनमा रोपिएको असमझदारीको फाइदा उठाउने तरखरमा छ ।

एमालेले त कांग्रेसलाई गठबन्धन तोडे एकलौटी सरकार चलाउन दिने र एमसीसी पारित गर्न सघाउने प्रस्ताव समेत गरिसकेको छ । यही विषयमा प्रधानमन्त्री देउवा र एमाले अध्यक्ष केपी शर्मा ओली बीच आइतार टेलिफोन वार्ता समेत भएको छ । प्रधानमन्त्री शेरबहादुर देउवाले शनिबार सत्तागठबन्धनको बैठकमा एमसिसि पारित गर्नुपर्ने धारणा राखेको र त्यसमा असहयोग भए गठबन्धन टुट्नसक्ने चेतावनी दिएको खवर सार्वजनिक भएसँगै गठबन्धनभित्र तरङग पैदा भएको छ ।

गठबन्धनमा रहेका सबै शिर्ष नेता विगतमा कुनै न कुनै रुपमा एमसिसिसंग सम्बन्धित रहेको र अहिले आएर यो बिषयलाई राजनीतिक मुद्दा बनाउन नहुने कांग्रेस नेता मिनबहादुर बिश्वकर्मा बताउँछन् । नेकपा माओबादी केन्द्रका नेता लिलामणि पोखरेलले भने नेपाली कांग्रेसले एमसिसि पारित गर्न खोजे तत्काल सत्तागठबन्धन छोड्ने चेतावनी दिएका छन् । नेकपा माओबादी केन्द्र र एकीकृत समाजबादी केन्द्रले अहिले आएर एमसिसिलाई चुनावी एजेण्डा बनाइरहेको छ ।

एमसिसि सम्झौता आर्थिक अनुदान नभएर सैनिक रणनिति र इन्डो–प्यासिक स्ट्राटेजी अन्तर्गत भएका कारण गठबन्धनकै सहमति अनुसार सम्झौता रद्द हुने नेकपा समाजबादी केन्द्रका नेता जगनाथ खतिवडाको दाबी छ । हिजो राष्ट्रियता नहेर्ने तर अहिले आएर राष्टियताका विषयमा खोक्रा अभिव्यक्ति दिनुको सट्टा संसदमा टेवल गर्दा सबैमाझ छर्लङग हुने लोसपाका नेता सर्बेन्द्र सुक्ला बताउछन् । स्थानीय निकायको निर्वाचन आगामी जेठमा गर्ने सत्तारुढ दलको निर्णयसँगै बल्झिएको एमसीसी विवादले गठबन्धनमा झनै दरार पैदा हुने देखिन्छ ।


क्याटेगोरी : जनगुनासो, प्रमुख समाचार, राजनीति, विचार/लेख, समाचार
ट्याग : #एमसीसीले तनाव, #प्रधानमन्त्री शेरबहादुर देउवा

तपाईको कमेन्ट लेख्नुहोस्