ओलीले भने सांसदहरुको काम भत्ता खाने मात्रै भयो, सात महिनामा ४७ करोड बढी खर्च

काठमाडौं । प्रमुख प्रतिपक्षी दल नेकपा एमालेका अध्यक्ष केपी शर्मा ओलीले संघीय संसद्ले कामै गर्न नसकेको दाबी गरेका छन् । शनिबार नेपाल निजामती कर्मचारी संगठनको ११ औं राष्ट्रिय अधिवेशनमा अध्यक्ष ओलीले सांसदहरूले भत्ता खानेबाहेक काम नगरेको बताएका हुन् । उनले विगतको जनादेश खण्डन भइसकेकाले नयाँ जनादेशमा जानुपर्ने अनिवार्य भएको बताए ।

संसद्लाई निकम्मा बनाएर अहिलेको जस्तो भत्ता खानेबाहेक के काम गरेको छ पार्लियामेन्टले ? ओलीले प्रश्न गरेका छन् । भत्ता खाने काम गरेको छ । मुद्दा लडेर फिर्ता ल्याएको संसद्ले के काम गर्छ विचरा ? सर्वोच्च अदालतले टिको लगाइदिएकाले सरकार बनाएका के काम गर्छन् विचरा ? ओलीले भनेका छन् । प्रतिनिधिसभालाई अध्यक्ष ओलीले सरकारमा रहँदा दुई पटक विघटन गरेका थिए ।

दुवै पटक सर्वोच्च अदालतले प्रतिनिधिसभालाई पुनःस्थापना गरेको थियो । दोस्रोपटकको विघटन पुनःस्थापना गर्ने क्रममा शेरबहादुर देउवालाई प्रधानमन्त्री नियुक्त गर्न परमादेश जारी गरेको थियो । विभाजनलाई लिएर एमालेले भदौ २३ गतेदेखि संसद्का दुवै सदनमा अवरोध गर्दै आएको छ ।

६ महिनादेखि एमालेले संसद्‍मा नाराबाजी गरिरहेको छ । आफैले काम गर्न नदिएको कारण सांसद्हरूले भत्ता र तलब लिइरहेका छन् । संसद अवरोध गर्ने र तलव भत्ता खाइरहने भन्दै एमालेको चर्को आलोचना भइरहदा ओलीले सोही कुरालाई लिएर संसद्ले काम गर्न नसकेको, सांसदले भत्ता मात्रै खाइरहेको अभिव्यक्ति दिएका छन् ।

७ महिनामा खर्च भयो ४७ करोड ३९ लाख ७ हजार
प्रतिनिधि सभा पुनःस्थापना भएको ८ महिना र निरन्तर अवरोध झेलेको ७ महिना पुग्दा सांसदहरूको तलब भत्तासहितको सेवा सुविधामा मात्र ४७ करोड ३९ लाख खर्च भएको छ । २०७८ साउनदेखि माघसम्ममा संघीय सांसदहरूको पारिश्रमिकमा १५ करोड १३ लाख ५८ हजार रुपैयाँ भुक्तानी भएको छ । सांसदका स्वकीय सचिवहरूको पारिश्रमिक बापत १० करोड २८ लाख ४ हजार रुपैयाँ साउनदेखि माघ महिनासम्ममा भुक्तानी भएको छ ।

त्यसैगरी संसदीय समिति र संसद् बैठकको भत्ताबापत सांसदहरूले २ करोड ५९ लाख ५४ हजार रुपैयाँ माघसम्म बुझे । सञ्चार, घर भाडा, धारा, बिजुली, विशेष भत्ता, पदाधिकारीको इन्धन आदिमा माघसम्म ४ करोड ३८ लाख ७० हजार रुपैयाँ सांसदहरूलाई भुक्तानी गरिसकिएको छ । फागुन महिनामा सांसदहरूको तलब, भत्ता समेतमा २ करोड रुपैयाँ, अन्य सुविधाबापत ७२ लाख ४३ हजार रुपैयाँ र सांसदका स्वकीयलाई पारिश्रमिक बापत १ करोड ३८ लाख रुपैयाँ पठाइएको छ ।

संसद् बैठकका लागि अधिवेशन आह्वान हुँदा सांसदहरूले आतेजाते भाडा समेत पाउने गर्छन्। माघ महिनासम्म आतेजाते भाडाबापत सांसदहरूलाई ८६ लाख ५० हजार रुपैयाँ भुक्तानी गरिसकिएको छ । संसद् बैठक सञ्चालन हुने स्थान अन्तर्राष्ट्रिय सम्मेलन केन्द्रको भाडामा पुससम्मको ७ करोड २७ लाख ८ हजार रुपैयाँ भुक्तानी गरिएको छ।

वार्षिक १६ करोड ५० लाख ५० हजार रुपैयाँ भाडा बुझाउने सहमति गरिएअनुसार मासिक १ करोड ३७ लाख ५० हजार रुपैयाँ संसद् सचिवालयले भाडाबापत बुझाउनुपर्छ । माघ र फागुन महिना समेतको भुक्तानी जोड्दा केन्द्रलाई भाडाबापत १० करोड २ लाख ८ हजार रुपैयाँ भुक्तानी हुनेछ। यी सबै रकम जोड्दा साउनदेखि फागुन सम्ममा ४७ करोड ३९ लाख ७ हजार रुपैयाँ खर्च भएको छ ।

थप समाचार

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप

कार्यवाहक प्रधानमन्त्री सिंहले भेटे राष्ट्रपति पौडेल

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…