संसदीय समितिमा सभापति चयनमा दलहरुको बेवास्ता

खोज पत्रिका मङ्लबार, २०८० साउन २, ०१ :३८ बजे

काठमाडौं । सानो संसदको रुपमा रहेको संसदीय समितिमा सभापति चयन हुन सकिरहेको छैन । दलीय भागबण्डाका आधारमा समितिका सभापतिहरु चयन गर्ने सहमति यसअघि नै भइसकेको छ तर लामो समय वित्दा पनि समितिका सभापति चयन हुन नसकेको हो । जसका कारण समितिका काम कारवाहीहरु प्रभावित भइरहेका छन् ।

संसदीय समिति गठन भएको लामो समय बितिसक्दा पनि समिति सभापति चयन सकेको छैन । जसका कारण समितिले गर्ने काम, कारबाहीहरु प्रभावित भइरहेको छ । हाल समितिको बैठक समितिका ज्येष्ठ सदस्यको सभापतित्वमा बस्दै आएको छ । निर्वाचित समिति सभापति नहुँदा समितिको काम कारबाही प्रभावकारी हुन नसकेको बताइएको छ ।

राजनीतिक दलहरुले आपसी समझदारीमा समिति सभापतिको भागबन्डा गरेको कुरा नेताहरुले बताउँदै आएपनि हालसम्म समितिले सभापति भने पाउन सकेको छैन । विभिन्न समितिमा गरी १० वटा विधेयकहरु विचाराधिन अवस्थामा रहेको छ । राज्य व्यवस्था तथा सुशासन समितिमा चार वटा, अन्तर्राष्ट्रिय सम्बन्ध समितिमा एउटा, कृषि, सहकारी तथा प्राकृतिक स्रोत समितिमा एउटा, कानून, न्याय तथा मानव अधिकार समितिमा दुई वटा, शिक्षा, स्वास्थ्य तथा सूचना प्रविधि समितिमा दुई वटा विधेयक दफावार छलफलका लागि पठाइएको छ ।

त्यसबाहेक प्रतिनिधि सभामा ६ वटा विधेयक प्रक्रियामा रहेको छ । विधेयकहरु समितिमा आएको भइपनि गम्भिर प्रकृतिका विषयवस्तुहरु आइनसकेको संघीय संसद सचिवालयका प्रवक्ता एकराम गिरी बताउछन् । समिति सभापतिको नेतृत्वमा समिति चलाउँदा नै समितिको सक्रियता र क्रियाशीलता बढ्ने उनको भनाई छ ।

उनले समिति निर्वाचनपछि समितिले थप गति लिने विश्वास व्यक्त गरे । उनले समितिहरुमा सार्वजनिक हीत र सरोकारका बिषयमा उजुरीहरु परिराखेका जानकारी दिए । समितिले उजुरी उपर सम्बन्धित निकायलाई बोलाएर छलफल गर्ने तयारी भइरहेको उनले बताए । यस अघिकै कतिपय उजुरीहरु पनि यथावत रहेका र नयाँ उजुरीहरु पनि परिरहेको उनी बताउछन् । उनले कार्यपालिकाबाट सम्पादन हुने कामहरुको निगरानी संसदीय समितिले गर्ने भएकाले समितिको काम प्रभावकारी हुनुपर्नेमा उनको जोड थियो ।