सुदूरपश्चिमका मुख्यमन्त्रीले बोलाए गठबन्धनको बैठक, सरकार विस्तारबारे छलफल

खोज पत्रिका मङ्लबार, २०८१ बैशाख १८, १४ :३६ बजे

कैलाली । सुदूरपश्चिम प्रदेशका मुख्यमन्त्री दीर्घबहादुर सोडारीले सत्तारुढ गठबन्धनको बैठक बोलाएका छन् । वैशाख ६ गते एमाले, माओवादी र नागरिक उन्मुक्ति पार्टीको समर्थनमा मुख्यमन्त्रीमा नियुक्त भएका सोडारीले सरकार विस्तार र विश्वासको मतका विषयमा छलफल गर्न बैठक बोलाएका हुन् ।

नेकपा माओवादी केन्द्र प्रदेश संसदीय दलका नेता मानबहादुर धामीले मुख्यमन्त्रीले बोलाएको बैठकमा विश्वासको मत र सरकार विस्तारका बारेमा छलफल हुने जानकारी दिए । मुख्यमन्त्री सोडारीले मंगलबार नै सरकार विस्तारको तयारी गरेको बताइएको छ । बिहीबार वा शुक्रबार भित्र विश्वासको मत लिने मुख्यमन्त्रीको तयारी छ ।

सोडारीले नागरिक उन्मुक्ति पार्टीका कैलाश चौधरीलाई भौतिक पूर्वाधार विकास मन्त्रीमा नियुक्त गरे पनि एमाले र माओवादी केन्द्रले तत्काल सरकारमा जाने इच्छा नदेखाएपछि अरु मन्त्रालय आफैसँग राखेका छन् । मंगलबार माओवादीबाट समेत मन्त्री बनाउने प्रयासमा मुख्यमन्त्री छन् ।

एमालेका १०, माओवादी केन्द्रका १०, नागरिक उन्मुक्ति पार्टीका ७ र एकीकृत समाजवादीका ४ जना प्रदेश सभा सदस्यको समर्थनमा सोडारी मुख्यमन्त्रीमा नियुक्त भएका थिए । सोडारीले नागरिक उन्मुक्ति पार्टीका ७ जनाको समर्थन देखाएपनि अहिलेसम्म अध्यक्ष रञ्जिता श्रेष्ठ पक्षका दुई जना मात्र उनको पक्षमा उभिएका छन् भने संरक्षक रेशम चौधरी पक्षका ५ जना विपक्षमा छन् ।

नाउपाका लक्ष्मणकिशोर चौधरी भने सोडारीविरुद्ध सर्वोच्च गएका छन् । सोडारी समेतका बहुमत सांसदले आफूलाई समर्थन गरेका कारण आफूलाई मुख्यमन्त्री नियुक्त गर्नुपर्ने उनको माग छ ।