विश्वासको मत लिदा कांग्रेसले किन गर्यो अवरोध ? प्रचण्ड किन रिसाए ?

खोज पत्रिका मङ्लबार, २०८१ जेष्ठ ८, ०३ :४० बजे

काठमाडौं । सोमबार विश्वासको मत लिन गरेको प्रस्तावमा प्रधानमन्त्री पुष्पकमल दाहाल प्रचण्डले एक सय ५७ मत पाएका छन् । विपक्षमा कुनै मत परेन । मत दिन्न भन्ने पक्षमा जम्मा एक मत परेको छ । सभामुखले मत विभाजन गर्दा दुई सय ७५ सदस्यीय प्रतिनिधिसभामा १५८ जना सहभागी रहेका थिए ।

प्रधानमन्त्री प्रचण्डले डेढ वर्षको अवधिमा सोमवार चौथो पटक विश्वासको मत पाएका हुन् । मत बिभाजनसँगै संसदमा सभामुख देवराज घिमिरेले प्रधानमन्त्रीले प्रतिनिधिसभाबाट विश्वासको मत पाएको घोषणा गरे । विश्वासको मत लिने सम्पूर्ण प्रक्रियामा नेपाली कांग्रेससहितका प्रतिपक्षी दलले अवरोध गरेका थिए ।

प्रधानमन्त्रीले संविधानको धारा १०० उपधारा २ बमोजिम प्रतिनिधिसभा नियमावली २०७९ नियम १५५ को उपनियम ४ बमोजिम प्रधानमन्त्रीले विश्वासको मतसम्बन्धी प्रस्ताव पेस गरेका थिए । कांग्रेससहित विपक्षी सांसदहरु भने मतदान प्रक्रियामा सहभागी नभइ नाराबाजी गरेका थिए । प्रधानमन्त्री पुष्पकमल दाहाल ‘प्रचण्ड’ले कांग्रेसले संसद्मा देखाएको व्यवहार गलत भएको भन्दै यसको मूल्य चर्को पर्ने चेतावनी दिए ।

प्रधानमन्त्री प्रचण्डले राखेको विश्वासको मतमाथिको छलफलका भाग लिँदैं सत्तारुढ नेकपा एमालेका उपाध्यक्ष विष्णुप्रसाद पौडेलले प्रधानमन्त्री प्रचण्ड नेतृत्वको वर्तमान सरकारले पूरै कार्यकाल काम गर्ने दाबी गरे ।

सरकारमा सहभागी दल जनता समाजवादी पार्टी नेपाल विभाजन भएसँगै सो पार्टीले समर्थन फिर्ता लिएपछि प्रधानमन्त्री प्रचण्डले फेरि विश्वासको मत लिनु परेको हो । तर, तेस्रो पटकसम्म सहजै रुपमा विश्वासको मत लिएका प्रचण्डलाई चौथो पटक भने निक्कै सकस भएको थियो ।