गृहमन्त्री रवि लामिछानेले भने जस्तै खुल्छन् त काण्डहरुका फाइलहरु ? (भिडियोसहित)

खोज पत्रिका मङ्लबार, २०८१ असार ११, १५ :११ बजे

काठमाडौं । उपप्र्रधान तथा गृहमन्त्री रवि लामिछानेले सोमबारको प्रतिनिधिसभा बैठकमा विभिन्न काण्डहरुका फाइल खोल्ने बताएका छन् । उनले सांसद र नागरिकस्तरबाट उठाउदै आएका प्रश्नहरुको जवाफ दिने क्रममा विभिन्न काण्डहरुका फाइल खुल्न लागेको बताएका थिए । गिरिबन्धु टि स्टेट‚ बाल मन्दिर‚ बाँसबारी‚ स्काउट‚ भुटानी शरणार्थी‚ जनकपुरको ९ हजार बिघा जग्गा‚ पतञ्जलीको फाइल खुल्ने भन्दै सांसदहरुलाई जानकारी गराएका थिए ।

गृहमन्त्री लामिछानेले प्रहरीको केन्द्रीय अनुसन्धान ब्युरो गिरिबन्धु टि स्टेटको उजुरी कुरेर बसेको बताएका थिए । उनले उजुरी आएपछि कुनै पनि वेला यस सम्बन्धमा अनुसन्धान गर्न प्रहरी तयार रहेको बताए । बालमन्दिर र स्काउटको फाइल बन्द नभएको पनि उनले बताए । उनले बाँसबारीको फाइल बन्द नभएको र टीकापुरको फाइल खुलाउन काम भइरहेको पनि बताए। उनले भुटानी शरणार्थीको बन्द भएको फाइल खुल्ने तयारीमा रहेको बताए ।

‘भुटानी शरणार्थीको बन्द भएको फाइल खुल्ने तयारीमा छ। बालमन्दिरको फाइल बन्द भएको छैन । स्काउटको फाइल बन्द भएको छैन। बाँसबारीको फाइल बन्द भएको छैन, खुलिसकेको छ‚’ उनले भने‚ ‘टीकापुरको फाइल खुलिरहेको छ‚ काम भइरहेको छ त्यसमा ।’ मन्त्री लामिछानेले वृहत जनकपुरको ९ हजार बिगाहा जग्गाको फाइल पनि तयार हुने क्रममा रहेको बताएका थिए ।

‘बृहत जनकपुरको ९ हजार बिघा जग्गाको फाइल तयार हुने क्रममा छ‚’ उनले भने‚ ‘कुनै पनि कालखण्डमा भएका भ्रष्टाचारको अनुसन्धान गर्न २५ वटा पुराना फाइलहरु एकत्रित गर्दै एउटा शक्तिशाली आयोग गठन गर्ने बजेटको व्यवस्था यसैपटकको बजेटमा व्यवस्था भएको छ ।’ उनले पतञ्जली आयुर्वेद कम्पनीको फाइल आजैबाट खुलेको जानकारी पनि दिए ।

गृहमन्त्री लामिछानेले बजेट पास भएको २ महिनाभित्र विगतमा भएका २५ वटा काण्डहरुको फाइल तयार गर्नको निमित्त एउटा शक्तिशाली आयोग बनाउने बताएका छन् । संसदमा गृहमन्त्रीले भनिएका फाइलहरु मध्ये तत्कालिन माओवादीको लडाकु शिविरको घोटाला कहिले खुल्छ भन्दै राप्रपाका प्रमुख सचेतक ज्ञानेन्द्र शाहीले जवाफ माग गरे । फाइलहरु खोल्ने चेतावनी दिएका गृहमन्त्री लामिछानेले कहिले फाइल खोल्छन् भने सबैले प्रतिक्षा गरिरहेका छन् ।