किन भयो दुई बर्षमै रास्वपा विरामी ? महामन्त्री डा.मुकुल ढकालको प्रतिबेदनले तरंग (भिडियोसहित)

खोज पत्रिका बिहिबार, २०८१ असार १३, १५ :११ बजे

काठमाडौं । राष्ट्रिय स्वतन्त्र पार्टी (रास्वपा) का महामन्त्री डा. मुकुल ढकालले सभापति रवि लामिछानेलाई पार्टीको वर्तमान अवस्थाबारे विषय समेटिएको प्रतिवेदन बुधबार बुझाए । उपनिर्वाचनपछि देशका विभिन्न क्षेत्रमा पुगेर पार्टीको अवस्थाबारे बुझेका ढकालले आफूले अनुभूति गरेका विषयलाई समेटेर प्रतिवेदन तयार गरी गृहमन्त्री समेत रहेका सभापति लामिछानेलाई हस्तान्तरण गरेका थिए । जेठ ६ गते पार्टीको केन्द्रीय कार्यालय घण्टीघरबाट शुरू गरेको आफ्नो ‘समीक्षा यात्रा’ का क्रममा ३८ वटा जिल्ला पुगेर २०७९ जनाभन्दा बढीसँग दोहोरो अन्तर्क्रिया गरिएको उनले बताएका छन् ।

‘महलदेखि जङ्गलसम्म बस्ने जनतासँग भेटी, हिमाल, पहाड, मधेस, तराईका सुगमदेखि दुर्गमका बस्ती पुगी, ८० किलोमिटर पैदल यात्रा र ४२१६ किलोमिटर सडक यात्रा गर्दै, कतै पिच सडक, कहिले भर्खरै ट्रयाक खोलिएका सडक हुँदै अन्त्यमा सुरूङ् मार्गबाट काठमाडौं प्रवेश गर्दै असार ५ गते, घण्टीघर काठमाडौँ आइपुगेर यात्रा समापन गरें,’ उनले उक्त समीक्षा यात्राको प्रतिवेदन पेश गर्दै सभापितलाई पत्रमार्फत जानकारी गराएका छन् ।

महामन्त्री ढकालले यो प्रतिवेदन पार्टीले पार्टीको समकालीन वस्तुस्थितिको यथार्थ चित्रण गर्नुकासाथै पार्टीले लिन पर्ने दिशाका सम्बन्धमा मार्गदर्शन समेत गर्ने आफ्नो विश्वास रहेको बताए । उनले यो प्रतिवेदन सबै तहका पार्टी पंक्ति तथा आम नेपालीमाझ प्रस्तुत गरिनुपर्नेमा पनि जोड दिएका छन् ।

११.३ लाख जनता जसले घण्टीमा भोट हाले उनीहरुले पनि प्रतिवेदन थाहा पउनुपर्ने उनको धारणा छ । उनले प्रतिवेदन सार्वजनिक नगरिए आफूमाथि पार्टीले गरेको अन्याय हुने भन्दै आफूमाथि न्याय गर्न अनुरोध गरिएको छ । प्रतिवेदनमा उनले यस्तै हिसाबले अगाडि बढे रास्वपाको हालत पनि विवेकशील साझा पार्टीको जस्तो हुने विश्लेषण प्रतिबेदनमा उल्लेख गरिएको छ ।

सत्ता र शक्तिको आशक्तिले रास्वपा कमजोर बन्दै गएको भन्दै पार्टीप्रति माया र चिन्ता भएरै आफूले गम्भीररूपमा समस्याको कुरा उठाएको जिकिर उनको छ । उनले माओवादी केन्द्रका अध्यक्ष प्रचण्ड र नेकपा एमाले अध्यक्ष केपी शर्मा ओलीसँग सत्ताका लागि सम्झौता गर्नुभन्दा काठमाडौँ महानगरपालिकाका मेयर बालेन शाहसँग मिल्नु पार्टीका लागि हितकर रहेको उल्लेख गरेपछि रास्वपामा तरंग ल्याइदिएको छ ।

पछिल्लो समय सभापति रवि लामिछाने लामिछानेसँग खेलकुद मन्त्री विराजभक्त श्रेष्ठ, महामन्त्री मुकुल ढकाल, उपसभापति स्वर्णिम वाग्ले, प्रमुख सचेतक सन्तोष परियार, शिक्षामन्त्री सुमना श्रेष्ठ, सांसदहरू सोबिता गौतम, निशा डाँगी र मनिष झा लगायत असन्तुष्ट छन् ।

पोखरा र बुटवलसहितका सहकारीको बचत अपचलन प्रकरणमा मुछिएको भन्दै सभापति लामिछानेले राजीनामा दिनुपर्ने माग पनि उठेको थियो । छानबिन अवधिभर लामिछानेले गृहमन्त्रीबाट बाहिरिनुपर्नेसहितका कुरा पनि नेताहरूले उठाइरहेका थिए । तर, सभापति लामिछानेले ती कुराको बेवास्ता गर्दै सरकारमै बसेको नेताहरुले बताइरहेका छन् ।