काठमाडौं उपत्यकामा भीषण बाढी,घर–घरमा पस्यो बाढी !

खोज पत्रिका शनिबार, २०८१ असार २२, २३ :४० बजे

काठमाडौं । शुक्रबार रातिदेखि परेको वर्षाले काठमाडौं उपत्यकाका बागमती, विष्णुमती, मनोहरा, हनुमन्तेलगायतका खोला तथा नदीमा पानीको सतह ह्वात्तै बढेको छ । कोरिडोरको नाउँमा नदी साँघुर्‍याउँदा वर्षाको पानीले नदी दायाँबायाँका क्षेत्र डुबानमा परेका छन् ।

वर्षा नरोकिएकाले नदीहरुमा पानीको सतह निरन्तर बढिरहेको छ । बागमती नदीको दायाँबायाँ रहेको शंखमुल, टेकु, सानेपा, बल्खु क्षेत्र पूरै डुबानमा परेको छ । बागमती करिडोरसमेत डुबानमा परेको छ ।

काठमाडौं उपत्यकामा रहेका सशस्त्र प्रहरी बल नेपालका एकाइबाट विभिन्न इलाकामा टोली परिचालन गरिएको छ । उपत्यकाको गोकर्णेश्वर, बल्खु, विष्णुमती, थापाथली, शङ्खमूल, मनोहरा, धोबीखोला, जडीबुटी मनोहरा खोला तथा पशुपति क्षेत्रसहित जोखिमयुक्त क्षेत्रमा सशस्त्र प्रहरी परिचालन गरिएको गरिएको छ ।

बल्खुको सुकुमबासी बस्ती पनि डुबानमा परेको छ । त्यहाँको तरकारी बजारमा समेत पानी पसेको छ। मनोहरा खोलामा आएको बाढीका कारण ललितपुरको च्यासलस्थित नेकपा एमालेको पार्टी कार्यालय परिसरमा पनि पानी पसेको छ ।

टेकु दोभान देखिकै नदी किनारका क्षेत्र यतिखेर जलाम्मे छ । कुलेश्वर फलफूल बजारको तल्लो भाग पनि आंशिक डुबानमा परेको छ । टेकु आवास क्षेत्र समेत डुबेको छ ।