मधेस प्रदेशमा २० जनाको जम्बो सरकार बनाएपछि चर्को आलोचना !

खोज पत्रिका बुधबार, २०८१ साउन २३, १५ :११ बजे

काठमाडौं । मधेश प्रदेशका मुख्यमन्त्री सतीशकुमार सिंहले मंगलबार मन्त्रिपरिषद् विस्तार गरेपछि यतिबेला सामाजिक सञ्जालमा चर्को आलोचना भइरहेको छ । १५ सदस्यीय मन्त्रिपरिषद्को नेतृत्व गरिरहेका सिंहले पाँच राज्यमन्त्री नियुक्त गरी २० सदस्यीय जम्बो मन्त्रिपरिषद् बनाएपछि उनको चर्को आलोचना भएको हो ।

मुख्यमन्त्री सिंहले सत्तारुढ नेपाली कांग्रेसबाट २ तथा जनमत, एमाले र लोसपाबाट १–१ राज्यमन्त्री नियुक्त गरी २० सदस्यीय जम्बो मन्त्रिपरिषद गठन गरेका हुन्‌ । कांग्रेसबाट रेखा ठाकुर भूमि व्यवस्था कृषि तथा सहकारी राज्यमन्त्री र निलमकुमारी रजक ऊर्जा सिँचाइ सरसफाइ तथा खानेपानी राज्यमन्त्री नियुक्त भएका छन् ।

एमालेबाट मो.जयद आलम भौतिक पूर्वाधार विकास, लोसपाबाट रामबाबु यादव शिक्षा तथा संस्कृति र जनमतबाट शम्भु साह उद्योग पर्यटन राज्यमन्त्री बने । नवनियुक्त राज्यमन्त्रीहरूले मंगलबार नै शपथ लिएका छन् । यो सँगै मधेश सरकारको मन्त्रिपरिषद् अहिले सम्मकै ठूलो २० सदस्यीय भएको छ ।

मधेशमा मुख्यमन्त्री तथा मन्त्रीपरिषद्‌को कार्यालय सहित १२ मन्त्रालय रहेको छ । मुख्यमन्त्री सिंहले साउन ३ गते कांग्रेस र लोसपालाई सरकारमा सहभागी गराउँदा १५ सदस्यीय मन्त्रिपरिषद् बनेको थियो । त्यतिखेरै प्रदेशका सबै मन्त्रालयले पनि नेतृत्व पाइसकेका थिए । सरकारमा जनमतका मुख्यमन्त्री बाहेक दुई मन्त्री, एमालेको चार मन्त्री र दुई राज्यमन्त्री, कांग्रेसको चार मन्त्री र लोसपाको एक मन्त्री थिए ।

कांग्रेसले दुई राज्यमन्त्री लिने सुँइको पाएपछि आफूले पनि थप एक राज्यमन्त्री पाउनुपर्ने अडान एमालेले राखेपछि मन्त्री थपिएका हुन । यतिबेला सत्तारुढ दलकै नेताहरूले सामाजिक सञ्‍जालमा सरकारको आलोचना गर्न थालेका छ्न् । सरकार विस्तारको सुचना यतिबेला सामाजिक सञ्जालमा भाइरल भइरहेको छ ।