आरजु राणाकी आमा राप्रपामा पुनः सक्रिय, बनिन् केन्द्रीय सल्लाहकार समिति सदस्य

खोज पत्रिका आइतवार, २०८१ भदौ १६, ०१ :५१ बजे

काठमाडौं । नेपाली कांग्रेसका सभापति शेरबहादुर देउवाकी सासु एवं परराष्ट्रमन्त्री डा. आरजु राणा देउवाकी आमा प्रतिभा राणा राष्ट्रिय प्रजातन्त्र पार्टीमा फेरि सक्रिय भएकी छन् । राप्रपा अध्यक्ष राजेन्द्र लिङ्देनले हिजो उनलाई पार्टीको केन्द्रीय सल्लाहकार समितिमा मनोनयन गरेका हुन । राणा पहिलेदेखि नै राप्रपामा रहेर विभिन्न लाभको पदमा समेत पुगेकी थिइन् ।

उनी जापानका लागि नेपालकी राजदुत भइन् । पछिल्लो समय निस्क्रिय भएकी थिइन । लामो समय राप्रपा केन्द्रीय सदस्य रहेकी राणा पहिलो संविधानसभामा राप्रपाबाट समानुपातिक सभासद बनेकी थिइन्। उनी विज्ञान तथा प्रविधि राज्यमन्त्रीसमेत बनिन् । २०७४ सालमा राणा जापानका लागि नेपाली राजदूत नियुक्त भइन् ।

कमल थापा परराष्ट्रमन्त्री भएका बेला राप्रपाबाट प्रतिभासहित निरञ्जन थापा र भरत रायमाझीलाई राजदूत बनाएका थिए । सरकार परिवर्तनपछि थापा र रायमाझी फिर्ता बोलाइए पनि प्रतिभा भने फर्किनु परेन । देउवाको राजनीतिक आडमा उनले राजदुतको ४ वर्षको पुरै कार्यकाल व्यतित गरेकी थिइन् । अहिले फेरि राप्रपा केन्द्रीय सल्लाहकारका रूपमा सक्रिय राजनीतिमा फर्किएकी हुन् ।

राणासँगै ललितपुरका बद्री सिलवाल, धादिङका गणेशबहादुर अधिकारी र रौतहटका जगदिशलाल श्रीवास्तवलाई पनि केन्द्रीय सल्लाहकार समितिको सदस्यमा मनोनयन गरिएको छ । छोरी आरजु शक्तिशाली परराष्ट्रमन्त्री भएका बखत फरक पार्टीमा प्रतिभाको राजनीतिक पुनरागमन भएको हो ।