प्रदेश संरचना हटाउन सक्ने अवस्था नरहेको कांग्रेस सभापति देउवाको दाबी

खोज पत्रिका बुधबार, २०८१ अशोज २, १५ :१६ बजे

काठमाडौं । सत्तारुढ नेपाली काँग्रेसका सभापति एवं पूर्वप्रधानमन्त्री शेरबहादुर देउवाले प्रदेश संरचना हटाउन सक्ने अवस्था नरहेको बताएका छन् । प्रदेश संरचना आवश्यक नरहेको टिप्पणी भइरहेका बेला उनले बनिसकेको प्रदेश संरचनालाई हटाउन सक्ने अवस्था नभएको धारणा राखे ।

पार्टीको कानून विभागले मंगलवार पार्टी मुख्यालय सानेपामा आयोजना गरेको संविधानको एक दशकः कार्यान्वयन र चुनौति विषयक विचार गोष्ठीमा सभापति देउवाले प्रदेश संरचनालाई अझै बढि उत्तरदायी र पारदर्शी बनाउने गरी सुधार भने गर्नुपर्ने बताए । उनले समानुपातिक समावेशी सिद्धान्त सबैका लागि आवश्यक भएकाले त्यसै अनुसार अघि बढ्नुपर्ने बताए ।

कार्यक्रममा कांग्रेस केन्द्रीय सदस्य तथा कानुन विभागका प्रमुख मानबहादुर नेपालीले संविधान पूर्ण रुपमा कार्यान्वयनको पाटोमा कांग्रेसले अग्रसर लिनुपर्ने बताए । उनले जनताको अधिकार सुनिश्चित हुने गरी आफैले बनाएको संविधान संविधानलाई थप पुरस्कृत गर्न संशोधन गर्नुपर्ने बताए ।