राजतन्त्र विस्थापित भएको १६ बर्षसम्म पनि किन डराउछन् पूर्वराजासँग नेताहरु !

खोज पत्रिका मङ्लबार, २०८१ अशोज २९, ०३ :१० बजे

काठमाडौं । नेपालबाट राजतन्त्र विस्थापित भएको १६ बर्ष बित्यो । नाराणहिटी दरबारबाट तत्कालिन राजा ज्ञानेन्द्र शाह परिवारसहित झोली कुम्लो बोकेर जनताको नासो जनतालाई नै फिर्ता गरे भन्दै निर्मल निवास पुगे । नारायणहिटीको कामकाज शितल निवास र सिंहदरबारबाट हुँदै आएको छ । तर, निर्मल निवासबाट हुने भ्रमण, पाठपुजा र बक्तब्यवाजीले गणतन्त्रबादी नेताहरु अझै किन तर्सिन्छन् भन्ने प्रश्न उब्जाइदिएको छ ।

नेपालमा गणतन्त्र ल्याउन दश बर्ष सशस्त्र संघर्ष र २०६३ पछि सत्ताको नेतृत्व तीन पटक र झण्डै १९ बर्षसम्म कुनै न कुनै रुपमा सत्तामा रहेको नेकपा माओवादी केन्द्रका अध्यक्ष पुष्पकमल दाहाल प्रचण्ड । केही दिनअघि सम्पादकहरुसँगको भेटमा प्रमुख प्रतिपक्ष दलका नेता प्रचण्डले पूर्व राजा ज्ञानेन्द्र शाहको भुटान भ्रमणबारे भनेका थिए नेपालको आन्तरिक राजनीतिक संकटको अभिव्यक्ति हो । तर, नेपालमा राजतन्त्र फर्किन सम्भव छैन् ।

‘भुटानमा जुन किसिमिको स्वागत भयो र त्यसपछि जुन किसिमको राजनीतिक अभिव्यक्ति आयो, संकटकै निरन्तरता ठान्छु’, ‘कहाँ पुगेर कसरी अभिव्यक्त हुन्छ भन्ने त अहिले फोरकास्ट (भविष्यवाणी) गर्न सकिँदैन ।’ गणतन्त्रमा गइसकेका जनता सजिलै राजतन्त्रतिर फर्किएको विश्व इतिहासमा अपवाद मात्र भएको भन्दै उनले वर्तमान राजा र उनको परिवारका कारण पनि त्यो सम्भव नभएको जिकिर गरेका थिए ।

पूर्व राजा ज्ञानेन्द्र शाहलाई भुटानले उच्च महत्व र सम्मान दियो । त्यो देखिएकै हो । तर, भुटानले गरेको त्यो स्वागत र सम्मानले नेपालमा फेरि राजतन्त्र फर्किन्छ भन्ने होइन । तर, गणतन्त्र ल्याउन संघर्ष गरेका दुई दशक गणतन्त्रको नुन पानी खाएर जनता हाम्रो पक्षमा छन् भन्ने नेताहरु किन सम्मान, धार्मिक स्थलमा गरिएका पाठपुजा, बेला बखत आउने निर्मल निवासका बक्तब्यवाजीले किन डराउछन् भन्ने प्रश्न उठ्छ ।

पूर्वराजा शाह जहाँ भ्रमणमा जान्छन् त्यहाँ लाग्ने ठूलो भीड मात्रै होइन दशैंको टीका लगाउन जानेहरुको शीतल निवास भन्दा निर्मल निवासमा देखिएको लर्कोले दलहरुप्रतिको बितृष्णा बढ्दैछ भन्ने संकेत गर्छ । त्यहि भीड देखेर पूर्वराजा शाहले नेताहरुलाई जवाफ दिए भुटानले मलाई गरेको सम्मान मलाई होइन नेपाली जनतालाई गरेको हो ।

चाडपर्व, स्वदेश तथा विदेश भ्रमण अनि बेला बखत आउने सचिवालयका बिज्ञप्तीले नै त्याग तपस्या र जेल बसेका नेताहरु किन डराउछन् । ज्ञानेन्द्रका बिज्ञप्तीले नै राजनीतिक दलका नेताहरुलाई निद्रा हराम गराइन्छ । अझै पनि सत्तामा बसेका नेताहरु हुन् या प्रतिपक्षमा रहेका नेताहरु राजतन्त्र १६ बर्षअघि विस्थापित गरेको राजतन्त्र फर्किदैन भन्दै चर्को स्वर बोल्नुको कुनै तुक छ र ? जनताका लागि राजनीति गछौं भन्दै ताली पिट्ने नेताहरुकै ब्यवहार र शैलीले नै राजतन्त्र फर्काउछौं भन्दै दौडिरहेकाहरुलाई थप बल पुगेको भने पक्कै हो ।