मेडिकल व्यवसायी दुर्गा प्रसाईं दोस्रो पटक पक्राउ, प्रधानमन्त्री ओलीविरुद्ध भ्रामक सामग्री प्रचार गरेको आरोप

काठमाडौं । प्रधानमन्त्री केपी शर्मा ओलीविरुद्ध भिडियो सन्देशमार्फत विवादास्पद अभिव्यक्ति दिएको आरोपमा मेडिकल व्यवसायी दुर्गा प्रसाईं पक्राउ परेका छन् । प्रसाईं विरुद्ध जिल्ला अदालतबाट साइबर अपराध सम्बन्धी कसुरमा पक्राउ पुर्जी जारी भएपछि प्रहरीले उनलाई कानुनी दायरामा ल्याएको हो । उनीमाथि साइबर अपराध, कीर्ते र मानहानी लगायतको मुद्दा चलाउने तयारी छ ।

प्रसाईंविरुद्ध अदालतमा अनुसन्धानका लागि बुधबार मात्र म्याद लिइने भएको छ । सोमबार सामाजिक सञ्जाल फेसबुकमा एक भिडियो भाइरल बन्यो । उक्त भिडियोमा प्रधानमन्त्री केपी शर्मा ओलीले कम्बोडियास्थित स्मार्ट एक्जिएटा टेलिकम कम्पनीमा २० करोड डलर लगानी गरेको आरोप लगाइएको थियो । भिडियोमा आरोप मात्र होइन, केही कागजात पनि देखाइएको छ । सार्वजनिक भएका कागजातमा प्रधानमन्त्रीको हस्ताक्षर नै किर्ते देखिएको प्रहरीको प्रारम्भिक निष्कर्ष छ ।

प्रधानमन्त्री ओलीको लगानी भनेर सार्वजनिक भएको सामग्री एकाएक भाइरल भएपछि त्यसको विषयमा सोध, खोज हुने नै भयो । यो सामग्री मेडिकल व्यवसायी दुर्गा प्रसाईंले नै निर्माण गरेका थिए । उनै प्रसाईं फर्जी कागजात बनाएको कसुरमा मंगलबार प्रहरीको फन्दामा परेका छन् । प्रहरीले उनीविरुद्ध ‘किर्ते गर्न नहुने’ अभियोग लगाउने तयारी गरेको छ ।

मुलुकी फौजदारी संहिता–२०७४ को दफा २७६ अनुसार किर्ते गर्न हुँदैन । सो ऐनको दफा ३०६ अनुसार बेइज्जती पनि गर्न पाइँदैन । सो कसुर पुष्टि भएमा २ वर्ष कैद र विद्युतीय माध्यमबाट त्यस्तो कसुर गरेमा थप १ वर्ष कैद सजाय हुने व्यवस्था छ । मुलुकी फौजदारी संहिता–२०७४ को दफा २८५ अनुसार आपराधिक उपद्रव गर्न पाइँदैन ।

प्रहरीले उनलाई आपराधिक उपद्रव विरुद्धको अभियोग पनि लगाउन सक्छ । आपराधिक उपद्रव पुष्टि भएमा ३ वर्षसम्म कैद हुन्छ । मुलुकी फौजदारी संहिता–२०७४ को दफा ८९ मा झुटा प्रमाण बनाउन नहुने कानुनी व्यवस्था छ । प्रहरीले उनीविरुद्ध झुटा प्रमाण बनाएको कसुरमा पनि अनुसन्धान गर्ने तयारी गरेको छ । झुटा प्रमाण बनाएको पुष्टि भएमा ५ वर्षसम्म कैद हुन्छ । मुलुकी फौजदारी संहिता–२०७४ को दफा ५८ अनुसार राष्ट्रपति वा संसदलाई धम्की दिन पाइँदैन । त्यसरी धम्क्याएको पुष्टि भएमा ७ वर्षसम्म कैद हुने व्यवस्था छ ।

प्रसाईं यसअघि पनि पक्राउ परेका थिए । प्रहरीको साइबर ब्यूरोले उनलाई असोज ६ गते भक्तपुरस्थित घरबाट पक्राउ गरेको थियो । त्यसबेला उनीमाथि रास्वपाकी केन्द्रीय सदस्य ज्वाला संग्रौलाले चरित्र हत्या हुने गरी अभिव्यक्ति दिएको आरोप लगाएकी थिइन । जिल्ला अदालत, काठमाडौंले उनलाई ९ दिनपछि १ लाख रुपैयाँ धरौटीमा छाड्न आदेश दिएको थियो । त्यो मुद्दा अझै अदालतमा विचाराधीन छ ।

उनले विगतमा बैंकको ऋण तथा ब्याज तिर्नुपर्दैन भन्दै कालोमोसो अभियान पनि चलाएका थिए । त्यसपछि अत्याधुनिक हतियार र एक सय राउण्ड गोली सहित पक्राउ परेका उनका दुई सुरक्षागार्डमाथि मुद्दा चल्यो । त्यसबेला उनका सुरक्षागार्ड लाइसेन्सप्राप्त हतियार लिएर अदालत पुगेका थिए । तर, जाँचका क्रममा एउटा हतियारको लाइसेन्स लिएर अर्कै बोकेको भेटिएको थियो ।

यसरी पटक पटक अराजक गतिविधि र अभिव्यक्ति दिँदै हिँडेका प्रसाईंलाई प्रहरीले फेरि कानुनी दायरामा ल्याएको छ । दुर्गा प्रसाईँ सबैभन्दा बढी प्रधानमन्त्री ओलीमाथि नै जाइलाग्ने गरेका छन् । एमाले र अध्यक्ष ओलीको बारम्बार आलोचना गर्दै आएका प्रसाईँले मंसिर ७ गते काठमाडौंमा आन्दोलन गर्ने तयारी गरिरहेका थिए । सोही दिन नेकपा एमालेले पनि काठमाडौंमै शक्ति प्रदर्शन गर्ने गरी कार्यक्रम जुधाएको छ ।

थप समाचार

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप

कार्यवाहक प्रधानमन्त्री सिंहले भेटे राष्ट्रपति पौडेल

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…