तल्लो बाटो हुँदै ८० लाख तिरेर अमेरिका, ८ जना नेपाली डिपोट, तुहिइयो अमेरिकाको सुन्दर सपना

काठमाडौं । लुकेरै भएपनि सपनाको देशमा जीवन यापन गर्ने आशमा रहेका आठ नेपालीलाई अमेरिकाले नेपाल पठाइदिएको छ । तल्लो बाटो ८० देखि ९० लाखसम्म रुपैयाँ बुझाएर अमेरिका पुगेका उनीहरुलाई कागजातविहिन आप्रवासी भन्दै देश निकाला गरेको हो । लाखौं खर्च गरेर अमेरिका पुगेका ८ जना नेपालीलाई हत्कडी र खुट्टामा चेनले बाँधेर अमेरिकाबाट फर्काइएको हो ।

अमेरिकाबाट डिपोर्ट भएका ८ जना नेपाली नागरिकलाई हत्कडी लगाएर काठमाडौं ल्याएको खुलेको छ । काठमाडौं ओर्लिएपछि प्रहरीको सोधपुछका क्रममा उनीहरूले आफूहरूलाई हत्कडी लगाएर ल्याएको बयान दिएका हुन् । अमेरिकाबाट आउँदा हत्कडीसँगै खुट्टामा समेत चेनले बाँधिएको तर, ट्रान्जिटपछि भने खुट्टाको चेन खोलिदिएको उनीहरुले बताएका छन् । बसेको ठाउँबाट हल्लिन पनि नदिएको र वासरुम प्रयोग गर्न पनि कयौं पटक अनुरोध गर्नुपरेको गुनासो उनीहरुले गरेका थिए ।

शपथ खाएकै दिन एक सय कार्यकारी आदेशमा हस्ताक्षर गरेर आफ्ना चुनावी बाचा पुरा गर्ने हतारोमा देखिएका अमेरिकी राष्ट्रपति डोनाल्ड ट्रम्प यतिबेला लाखौ करौडौं रूपैयाँ बुझाएर तल्लो बाटो हुदै अवैध रुपमा अमेरिका पसेका नेपालीहरुका लागि साढे सातकै दशा बनेका छन् । ट्रम्पले राष्ट्रपतिको पदभार सम्हालेको मिति अर्थात् जनवरी २० तारिखयता ३६ जना नेपाली डिपोर्ट भएको अध्यागन कार्यालयले जनाएको छ । जसमध्ये २८ जना नियमित उडानबाट र बुधबार ८ जना चार्टर्ड विमान मार्फत फिर्ता भएका हुन् ।

अमेरिकाबाट फर्काइएकामध्ये एक जना डोटी जिल्लाका हुन् भने अरु दाङ र रुकुमका हुन् । फर्काइएकाहरू ४७, ३७, ४२, २९, २२, २४, २३ र ३५ वर्षका छन् । अमेरिकाले काठमाडौं ल्याएर छाडिदिएका आठै जनालाई त्रिभुवन अन्तर्राष्ट्रिय विमानस्थल अध्यागमन कार्यालयले मानव बेचबिखन अनुसन्धान ब्यरोको जिम्मा लगाएको थियो । जहाँ सोधपुछपछि परिवारको जिम्मा लगाइएको छ । अमेरिकाको अध्यागमन कार्यालयले सार्वजनिक गरेको सूची अनुसार १ हजार ३६५ जना नेपाली पनि अमेरिकाबाट निष्कासनमा पर्नेछन् ।

राष्ट्रपति ट्रम्पले आफ्नो दोस्रो कार्यकालको शुरूआतसँगै आप्रवासन नीतिमा कडाइ गरिरहेका छन् । जनवरी २० मा ट्रम्पले शपथग्रहण गरेसँगै अमेरिकामा रहेका अवैध आप्रवासीलाई उनीहरूकै देश फर्काउन शुरू गरेका थिए । अमेरिकाको ‘इमिग्रेसन एन्ड कस्टम इन्फोर्समेन्ट’ (आईसीई)का अनुसार १३ सय ६५ नेपालीसहित १४ लाख ४५ हजार ५४९ अवैधानिक आप्रवासी तत्काल निष्कासन गर्नुपर्ने सूचीमा छन् ।

सबैभन्दा धेरै होन्डुरस, ग्वाटेमाला, मेक्सिको, एल साल्भाडोर लगायत देशका नागरिक छन् । अवैध रूपमा वा स्थलमार्गबाट नेपालीहरू कोलम्बिया, पनामा, कोस्टारिका, निकारागुवा, ग्वाटेमाला पार गरेर मेक्सिको हुँदै अमेरिका पुग्ने गरेका छन् ।

पैदलमार्ग तल्लो बाटो हुँदै विभिन्न दलालमार्फत नेपालीहरू अमेरिका प्रवेश गर्ने तमाम नेपालीहरु अहिले लुकेर बसेको अवस्था छ । अवैध रूपमा अमेरिका पुग्नु भयावह छ । दाङ, रुकुम पश्चिम, रुकुम पूर्वलगायत जिल्लामा दलालको पछि लागेर अवैध बाटो अमेरिकातर्फ जाने होडबाजीले कतिपयको बिचल्ली भइरहेको छ ।

थप समाचार

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…

माओवादीको अभियान कार्यतालिका हेरफेर,आजदेखि कुन जिल्लामा कहिले ?

कुलमान घिसिङलाई स्पष्टीकरण सोध्ने मन्त्रिपरिषद्को निर्णय