शिक्षामन्त्रीको राजीनामाले निम्त्याएको प्रश्न ? शिक्षकको सडकमै बास,प्रधानमन्त्रीको छैन् आस

काठमाडौं । विद्यालय शिक्षा ऐन माग गर्दै शिक्षकहरुले राजधानी केन्द्रित आन्दोलन गरेको २० दिनमा शिक्षा विज्ञान तथा प्रविधिमन्त्री विद्या भट्टराईले राजीनामा दिएकी छन् । नेपाल शिक्षक महासंघ र मन्त्रालयबीच बारम्बार संवाद भएपनि सहमति जुट्न नसकिरहेको बेला शिक्षामन्त्री भट्टराईबाट राजीनामा आएको हो । मन्त्रिपरिषदबाट शिक्षकहरुको मागबारे आवश्यक निर्णय हुने अपेक्षा गरिएकै बेला मन्त्रीले राजीनामा दिएर बाहिरिएकी छन् । प्रधानमन्त्री निवास पुगेर उनले प्रधानमन्त्री केपी शर्मा ओलीलाई शिक्षकहरुको मागमा बेवास्ता गरेको भन्दै राजीनामा पत्र थमाएकी हुन् ।

शिक्षक महासंघसँग बारम्बार संवाद भइरहेको भएपनि निचोड निस्कन नसकेपछि शिक्षामन्त्री भट्टराई घेराबन्दीमा परेकी थिइन् । उनी गत असार ३१ मा शिक्षामन्त्रीमा नियुक्त भएकी थिइन् । कास्की क्षेत्र नम्बर–२ बाट प्रत्यक्ष निर्वाचित भएर उनी संघीय सांसद बनेकी थिइन् । शिक्षामन्त्री बन्नुअघि उनी प्रतिनिधिसभाको शिक्षा, स्वास्थ्य तथा सूचना प्रविधि समितिकी सदस्यको रूपमा सक्रिय थिइन् । शिक्षा ऐन जारी नभएसम्म घर नफर्किने अडान लिएका शिक्षकहरुकै कारण भट्टराई बाहिरिनुपरेको छ ।

शिक्षकका माग पूरा गर्छौ भन्दै सार्वजनिक रुपमा बोलेपनि प्रधानमन्त्री ओलीले तदारुकता नदेखाएको आरोप लागिरहेको छ । सोमबार मात्रै प्रधानमन्त्री ओलीले देशको ढुकुटीले धान्न सक्ने र सम्भव हुने मागलाई राज्यले सम्बोधन गर्ने भन्दै अविलम्ब वार्तामा बसेर विद्यालय फर्कन आन्दोलनरत शिक्षकहरूलाई आग्रह गरेका थिए । प्रधानमन्त्री ओलीले अहिलेको सरकार दमनकारी नभई लोकतान्त्रिक भएकाले ट्रेड युनियनको अधिकारको रक्षासहित पेसागत क्षेत्रका जायज मागलाई सम्बोधन गरिने बताए ।

संसदीय समितिमा विचाराधीन विद्यालय शिक्षा विधेयकका लागी यत्रा शिक्षकहरु काठमाडौं आउनु पर्ने जरुरी नभएको बताउदै उनले विद्यालयमा फर्केर भर्ना अभियान शुरु गर्न तथा एईईको कापी समेत जाच गर्न आग्रह गरे । प्रधानमन्त्रीले विद्यालयमा फर्कन शिक्षकहरुलाई आग्रह गरेपनि शिक्षकहरु भने ऐन नलिएसम्म घर नफर्कने अडानमा छन् । बिगत २० दिनदेखि काठमाडौंको सडकमा उनिहरुको प्रदर्शन जारी छ ।

विगतमा सरकारले सम्झौता गर्ने तर पूरा नगर्ने गरेकाले यस पटक शिक्षा ऐन जारी नगरेसम्म विद्यालय नफर्किने अडान शिक्षकहरुको छ । शिक्षकहरु शैक्षिक हड्ताल गरेर आन्दोलनमा होमिएका कारण लाखौ विद्यार्थीको भविष्य अन्यौल भएको छ ।

सोमबार त आफूलाई ललितपुरको गोदावरीस्थित सरस्वती माध्यमिक विद्यालयका अभिभावक बताउने सनोज महतले आन्दोलनकै बीचमा गएर आन्दोलनको विरोध जनाए । आफ्नो छोरीको भर्ना हुन नपाएपछि सडकमा आएको बताउदै उनले शिक्षकहरुलाई आन्दोलनको स्वरुप फेर्न समेत आग्रह गरे । महतले शिक्षकहरुलाई आन्दोलनको स्वरुप फेर्न आग्रह गर्दै गर्दा शिक्षकहरु भने आफुहरु रहरले नभइ बाध्यताले आन्दोलनमा आएको बताएका थिए ।

कतिपय शिक्षकले त आफ्नो आन्दोलनमा घुसपैठ भएको भन्दै महतलाई हातपात समेत गरे । सरकारले आगामी बजेट अधिवेशन वैशाख १२ गते बोलाएको छ । शिक्षा विधेयक जारी गर्न र शिक्षकहरुका माग पूरा गर्नका लागि अधिवेशन बोलाइएको सरकारले स्पष्ट पारेपनि सरकारको प्रतिवद्धतामा शिक्षकहरु विश्वस्त छैनन् । अझ आफ्ना माग सम्बोधनको सट्टा शिक्षामन्त्रीले नै राजीनामा दिएपछि थप समस्या निम्तिएको छ ।

थप समाचार

कक्षा १२ को वार्षिक परीक्षा नसर्ने

म शिक्षामन्त्री बन्ने लाइनमा छैन्ः डा.अन्जान शाक्य

नेपाल आइपुगे ब्राजिलियन लेजेण्ड रोबर्टो कार्लोस

काठमाडौं आइपुगे भारतका विद्युत् मन्त्री

संघीय निजामती विद्येयक पारित गर्ने अन्तिम तयारी,खोजियो प्रधानमन्त्री ओली र…

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप