काठमाडौंमै बढ्यो डेंगुको संक्रमण, अस्पतालहरुमा विरामी बढे

खोज पत्रिका मङ्लबार, २०७८ कार्तिक १६, ०३ :४२ बजे

काठमाडौं । कोरोना महामारीको बेला नियन्त्रणमा देखिएको डेंगु संक्रमणको जोखिम फेरि बढ्न थालेको छ । पछिल्ला दिन काठमाडौका विभिन्न अस्पतालहरुमा डेंगुका विरामीहरु भर्ना हुने क्रम बढेको पनि छ । लामखुट्टेको टोकाइबाट सर्ने यो रोगको प्रकोपबाट बच्न चिकित्सकले सुझाव समेत दिएका छन् । कोरोना माहामारी सुरु भएयता नेपालमा डेंगुको संक्रमण खासै देखिएको थिएन । तर यस बर्ष यो रोगको प्रकोप बढेको छ । खास गरेर वर्षायाममा लामखुट्टेको टोकाइबाट सर्ने यो रोग उपत्यका बाहिरका जिल्लाहरुमा बढी देखिने गरेको थियो । तर यसपटक उपत्यका मै डेंगुको अत्याधिक प्रकोप देखिएको छ ।

उपत्यकामा लामो समय फोहोर व्यवस्थापन नहुँदा यो रोगको सामना गर्नु परेको विरामीको गुनासो छ । खासगरी डेंगु फैलाउने लामखुट्टे सक्रिय हुने समय मनसुनपछिको दिन अर्थात् कात्तिक र मंसिर महिना नै हो । डेंगु लागेमा ज्वरो आउने, आँखाको गेडी दुख्ने, जोर्नी दुख्ने, शरीरमा स–साना बिमिरा आउने, आँखा रातो हुने, वाकवाक लाग्ने जस्ता लक्षणहरु देखिने गर्छन् । अहिले कोरोना संक्रमणको जोखिम कम भइ नसकेको अवस्थामा समेत कतिपयले यो रोगलाई समान्य रुपमा लिने र परामर्शका लागि अस्पताल समेत नजाने देखिएको छ । तर, चिकित्सक भने यो रोगको लक्ष्मण देखिएको खण्डमा लापरवाही गर्न नहुने धारणा राख्छन् ।

मुख्यतया डेंगुवाट बच्न लामखुट्टेको टोकाइवाटै बच्नुपर्छ । तसर्थ आफ्नो घर सफा राख्दै पानी जम्ने खाल्डा खुल्डीहरु पुर्नुपर्छ । साथै दिउसोमा लामखुट्टेको टोकाईबाट बच्न धुप वा क्रिम प्रयोग गर्नु झ्याल ढोकामा जाली राख्न चिकित्सकले सुझाव दिएका छन् । सन् २००४ मा नेपालमा पहिलो पटक डेंगुको रोगी भेटिएका थिए । सुरुमा विदेशी नागरिकमा भेटिएको डेंगु सन् २००६ मा भने तराई तथा भित्री मधेसका केही जिल्लामा फेला परेको थियो । त्यसपछि भने यसले अन्य जिल्लाहरुमा समेत महामारीको रूप लिन थालेको छ । कोरोना संक्रमण जोखिम कायमै रहँदा डेंगुका बिरामी बढ्दै जाँदा यसपाली पनि यो रोगले महामारीको रुप लिन सक्ने देखिएको छ ।