चटके कुराको पछि नलाग्ने गगनको दाबी,छानविन समिति नबनाए संसद नचल्ने(भिडियोसहित)

खोज पत्रिका आइतवार, २०८१ बैशाख ३०, ०३ :३० बजे

काठमाडौं । नेपाली कांग्रेसले सरकार गृहमन्त्री रवि लामिछाने सहकारी ठगीमा संलग्न भएकोबारे संसदीय छानबिन समिति नबनाउनेतर्फ उद्यत भएको निष्कर्ष निकालेको छ ।

पार्टी सभापति शेरबहादुर देउवा निवास बूढानीलकण्ठमा बसेको पदाधिकारी बैठकले सरकार समिति नबनाई जबरजस्ती अघि बढ्न खोजेको निष्कर्ष निकालेको हो । बैठकपछि महामन्त्री गगन थापाले सञ्चारकर्मीसँग कुरा गर्दै जसरी भए पनि संसद पनि चल्न नदिने, छानबिन समिति पनि बनाउन नदिनेतर्फ सरकार उद्यत भएको बताएका हुन ।

थप छलफल गर्न र संसदीय छानबिन समिति गठनको मागलाई सशक्त रुपमा प्रस्तुत गर्न संसदीय दलको बैठक बस्ने निर्णय भएको छ । पदाधिकारी बैठकले सोमबार दिउँसो एक बजे संसदीय दलको बैठक बस्ने तय गरेको छ । उनले आफूहरूको माग पनि सम्बोधन होस् र संसद पनि चलोस् भन्ने सदाशयता राख्दाराख्दै पनि सरकारले रबैया देखाएको आरोप लगाए ।

उनले एमालेसँग संविधान कार्यान्वयन निर्वाचन प्रणाली, संघीयता कार्यान्वयन लगायतको विषयमा छलफल हुनसक्ने बताए । उनले अहिले गृहमन्त्री रवि लामिछानेमाथि सहकारी प्रकरणको छानविन समिति बनाएपनि गृहमन्त्रीको राजीनामा नमाग्ने प्रष्ट पारे । उनले धेरै चटके कुराको पछि नलागी संसदीय समिति बनाउन सहयोग गर्न समेत रविलाई आग्रह गरे ।